Ji bo balkişandina 8’ê Adarê Roja Jinan a Cîhanê li herêma Firatê meşek hate lidarxistin. Di axaftinan de hate diyarkirin ku ji bo azadiya civakê divê jin azad bibin.

Gel Qada Jina Azad kom bû û posterên Rêberê Gelê Kurd Abdullah Ocalan vekir.

Meş li Qada Aştiyê veguherî mitîgnê. Di mitîngê de ji rêveberên Meclisa Navçeya Sirîn Mihemed Selmo axivî û 8`ê Adarê pîroz kir. Mihemed Selmo destnîşan kir ku jinan ji ber zilm, qeyd û paşguhkirina di nava dîrokê de gelek zehmetî dît û wiha domand: "Em hêvî dikin ku jin di zûtirîn demê de azadiya xwe bi dest bixe û rola xwe ya sereke di civakê de vegerîne."

Mihemed Selmo di axaftina xwe de sûcên ku li dijî jinên li Bakur û Rojhilatê Sûriyê çi ji aliyê dewleta Tirk û çi ji aliyê çeteyên wê ve têne kirin, şermezar kir.

Paşê cîgirê Hevserokatiya Meclisa Kantona Girê Spî Sebrî Nibo jî 8`ê Adarê li jinên berxwedêr û azadîxwaz pîroz kir.

Sebrî Nibo destnîşan kir ku bi saya fikrên Rêber Abdullah Ocalan jin di qadên xebat û têkoşîna ji bo avakirina civakeke azad dixebitin, dikare şer bike, civakê ava bike.

Di dawiyê de Sebrî Nibo îşaret bi têkoşîna bi fikirên Rêbertî re kir da ku civakeke azad û wekhev ava bikin.