Bi sedan jin li Kabîlê guh nedan kevneşopiyên Afganiyan û cara yekemîn cenazeyê jinekê danîn ser milê xwe û heta goristanê hilgirtin. Jinan xwest ku kujerên jina bi navê Ferhunde ya 27 salî ku bi awayekî hovane li ber çavên polîsan hate qetilkirin bên cezakirin.

Wezareta Hundir a Afganîstanê bi daxuyaniyekê aşkera kir ku tevî 8 polîsan, 13 kes  ji ber vê bûyerê hatine binçavkirin.
Hate ragihandin ku bi fermana Serokkomarê Afganîstanê Eşref Ganî  lêpirsîn hate destpêkirin û di encama lêpirsînê de aşkera bû ku jina ciwan Ferhunde Qûran neşewitandiye.

Komek ku piraniya wan zilam bûn li nava kolanên paytexta Kabîlê bi hev re li jina bi navê Ferhunde xistin û polîsan jî tenê temaşeyî bûyerê kiribûn. Koma qelebalix piştre cenazeyê jina Afxan şewitandin.