Li paytexta Fransayê Parîsê, çalakiya edaletê ya ji bo yek ji damezirînera PKK’ê Sakîne Cansiz, Endama KNK’ê ya Parîsê Fîdan Dogan û Endama Tevgera Ciwanan Leyla Şaylemez ên ku di 9’ê Çileya 2013’an de hatibûn qetilkirin, dewam dike. Bi daxwaza ronîkirinê û li ser banga Tevgera Jinên Kurd ên Ewropa weke her Çarşemê di hefteya 205’emîn de jî, ji bo 3 jinên şoreşger edalet hate xwestin.

Çalakî li ber Navenda Civaka Kurd a Demokratîk a Parîsê destpê kir û endamên SKB’ê jî destek danê.

Domahiya meşê, wêneyên 3 jinên Kurd ên şoreşger hatin rakirin, dirûşmeyên “Em hemû Sakîne, Fîdan û Leyla ne” hatin berzkirin.

Dema girse gihişt ber Buroya Enformasyona Kurdistanê, deqeyek rêz girtin.

‘EM DEST JÊ BERNEDIN’

Nûnerên Tevgera Jinê ya Kurd a Ewropayê û Yekîtiya Jinên Sosyalîst, têkîldarî mirina kujer Omer Guney ku yekane bersûcê Qetlîama Parîsê bû, nerazîbûnên xwe anîn ziman. Di axaftinan de ev hatin ziman; “Hikûmeta Fransayê ji bo berjewendiyên xwe yên siyasî û aborî bi dewleta Tirk re ketiye nav têkîliyên qirêj, tevî ku 4 sal di ser qetlîamê re derbas bûye jî hê doz nehatiye destpêkirin, ev jî rewşê bi eşkere datîne holê. Ev merheleya Doza Qetlîama Parîsê, ji bo edalet û daraza Fransayê şermek e. Em ê dest ji vê dozê bernedin, ti carî nehêlin li demê bê belavkirin û jibîrkirin.”

Di çalakiyê de ji bo meş û mîtînga navendî ku wê 7’ê Çileyê li Parîsê bê lidarxistin jî banga tevlîbûna xurt hat kirin.