Endama Koordînasyona KJK’ê Besê Erzîncan diyar kir, ku komploya navneteweyî ya li dijî Rêberê Gelê Kurd Abdullah Ocalan pêk hat, 23 sal in bi rengekî giran dewam dike û berxwedan û sekna azadiyê ya li Îmraliyê bi rêzdarî silav kir.

Besê Erzîncan got, “Rêberê me weke Prometûs ê hemdem agirê azadiyê ji serdestan stand û da destê bindestan. Ji bo rakirina tecrîda li ser Rêberê me û misogeriya azadiya wî ya fîzîkî, di serî de li zindanên Tirkiyeyê girtiyên ji doza PKK-PAJK’ê, li kampên Mexmûr û Lavrîoyê grevên birçîbûnê dewam dikin, van çalakiyan silav dikim. Gelê me li çar parçeyên Kurdistanê û li her devera lê ye, ji bo Rêberê me timî çalakiyan dikin. Çalakgerên Strasbourgê jî çalakiya xwe dewam dikin. Van çalakiyan hemûyan silav dikim, pîroz dikim.”

‘FIKRÊN RÊBER APO, GELÊ KU AFIRANDIYE BÛYE TIRSA SÎSTEMA HEGEMONÎK’

Besê Erzîncan anî ziman, ku di dîlgirtina Rêberê Gelê Kurd Abdullah Ocalan li nava sîstema tecrîdê de teşwîqa sîstema modernîst a kapîtalîst heye û got, “Sîstema hov a Îmraliyê û pîvanên wê ne tenê pergaleke dewleta Tirk e. Rêbazên herî giran ên li dijî mirovahiyê yên sîstema dewletê ya navneteweyî li Îmraliyê di meriyetê de ye. Bêguman sedema bingehîn a şidandina tecrîda li Îmraliyê, krîz û rewşa xitimandî ya modela netewe dewletê heye, ku amûra bingehîn a sîstema modernîst a kapîtalîst e. Fikrên Rêber Apo, gelê ku afirandiye, rastiya jin û rêxistina afirandiye, sîstema hegemonîk ditirsîne. Ji ber ku Konfederalîzma Demokratîk û Alternatîfa Neteweya Demokratîk a ku Rêberê me pêşkêş dike, amûr û felsefeya bicihanîna pêngaveke nû û jiyaneke nû destnîşan dike. Di vê mijarê de rola ku Rêberê me pê radibe li cîhanê, Rojhilata Navîn û Kurdistanê stratejîk e.”

Besê Erzîncan anî ziman ku fikir û îdeolojiya Rêberê Gelê Kurd Abdullah Ocalan di nava 10 salên dawî de ji her demê bêhtir li nava civak û jin ên cîhanê belav bûye, hatiye pejirandin, gerdûnî bûye û got, “Berxwedana jinan û gelê me ya bi pêşengiya gerîla, kir ku nêrînên Rêberê me li tevahiya cîhanê belav bibe.”

‘DI ŞERÊ HEFTANÎN, METÎNA, ZAP Û AVAŞÎNÊ DE ÊDÎ ASTEKE GELEKÎ CUDA Û ŞAREZA DEST PÊ KIRIYE’

Endama Koordînasyona KJK’ê Besê Erzîncan bi dewamî têkoşîna gerîla ya li dijî dagirkeriyê nirxand û destpêkê berxwedana gerîlayên HPG û YJA Starê yên li Avaşîn, Zap, Metîna, Heftanîn û Xakurkê silav kir, çalakiyên gerîla pîroz kir.

Besê Erzîncan di şexsê Ûlaş Dersim, Nûjîn, Şoreş Beytuşşebap, Rêber, Kûrtay, Serhat Giravî, Zafer, Rûken, Sarya, Bawer, Diyana û Delal de şehîdên şoreşê bi bîr anî û got, “Li Herêmên Parastinê yên Medyayê, şerê ku li dijî dagirkeriya dewleta Tirk tê meşandin şerê xweparastinê yê herî mezin ê dîrokê ye. Li dijî teknîkên herî pêşketî ku dewlet jî nikarin li ber rabin, li dijî êrişên bi balafiran, li ser bingeha gerîlatiya modernîteya demokratîk berxwedan tê meşandin.

Gerîlayên HPG û YJA Starê di dîroka mirovahiyê de ji aliyê rêbazê şer ve asteke gelekî cuda afirandine. Lewma li xaka Kurdistanê ne tenê gelê me li dijî artêşa Tirk a dagirker û çeteyên wê tê parastin, her wiha ji bo mirovahiya dixwaze azad bibe bi rengekî hêja pêşengî tê kirin.

Artêşbûna Jinê ya YJA Starê asteke girîng a awarte temsîl dike. Di şerê parastina Kurdistanê û jiyana azad de bi fedakariyeke mezin, bi rengekî şareza û bi biryar li refên herî pêş e. YJA Star îro li Kurdistanê navê fedayîtiyê ye.

Di dîroka me de gelek qonaxên artêşbûna me ya jinê hene. Lê belê di şerê dawî yê Heftanîn, Metîna, Zap û Avaşînê de em dikarin bêjin ku êdî derbasî qonaxeke gelekî cuda û şareza bûne. Artêşbûna me ya jinê bi berxwedana YPJ’ê derbasî qonaxeke nû bûye. Ya ku niha diqewime ew e ku ev yek derbasî asteke hîn şareza bibe. Qonaxeke nû ye. Gerîlatiya modernîteya demokratîk bi pêşengiya jinê pêk tê. Di dîroka me de çalakiyên herî zêde yên xweser vê demê hatin lidarxistin û bîlançoyên wan jî hate eşkerekirin. Di vê demê de pêk tên.

Lewma di vê demê de ku ji bo Kurdan man û neman e, gerîlatiya jinê bi rengekî awarte bi pêş dikeve û tê temsîlkirin. Asta ku YJA Starê xwe gihandiye, asta hişmendî û îradebûna jinên Kurd radixe pêş çavan. Di şexsê jinên Kurd de biryardarî û daxwaza azadiyê ya gelê jme nîşan dide. Berxwedana jinan, biryardariya xwe gihandina azadiyê bi rengekî şênber li gerîla tê nîşandan.”

‘XELKÊ ME YÊ ŞENGALÊ WÊ BI BERXWEDANA XWE AZAD BIBE’

Endama Koordînasyona KJK’ê Besê Erzîncan êrişên dewleta Tirk a dagirker ên li ser Şengalê û Bakur-Rojhilatê Sûriyeyê jî nirxand û wiha dewam kir:

“Li Şengalê 16’ê Tebaxê êriş li dijî fermandarê YBŞ’ê û dîplomat hevalê Seîd êriş hate kirin. Piştre jî 17’ê Tebaxê êriş li dijî nexweşxaneyekê hate kirin. Di vê êrişê de şervanên azadiyê û wezîfedarên nexweşxaneyê yên hêja şehîd bûn. Di serî de hevalê Seîd şehîdan hemûyan bi rêzdarî bi bîr tînim. Armanc ji vê êrişê ew bû ku Êzidiyan bitirsînin û teslîm bigirin. Tê xwestin ku xelkê me yê Êzidî bikin kole. Nayê xwestin ku xwe bi xwe bi rê ve bibin. Ji aliyê dîrokî ve bi ferzkirina fermanan hewl tê dayin ku bi temamî çanda Êzidiyatiyê ji holê rakin. Li dijî vê yekê jî di serî de dayik û jinên Şengalî berxwedaneke mezin heye. Berxwedana xelkê me yê Êzidî silav dikim û pîroz dikim. Xelkê me yê Êzidî her ku rêxistiniya xwe, yekîtiya xwe xurt bike û li ber xwe bide, her ku xweparastina xwe xurt bike wê teqez azad bibe. Xelk, jinên Şengalê li ber xwe bide, bi xurtî li rêveberiya xwe ya xweser derkeve wê ji aliyê dîrokî ve firsenda azadiyê bixin meriyetê. Azadî bi xwerêvebirin û xweparastinê dibe.”

‘MIROVEK BI TENÊ JÎ MA BE KU BAWERIYA XWE BI RÊBER APO ANÎ BE, WÊ LI BER XWE BIDE’

Besê Erzîncan ragihand ku êrişên dewleta Tirk a dagirker ên li ser Rojava dema dawî zêde bûye û got, “Herî dawî li Til Temirê di asta fermandariyê de Sosin Bîrhat û Rênas Roj şehîd xistin. Wan bi rêzdarî bi bîr tînim. Hevala Sosin Bîrhat di parastina Rojava de bi rengekî fedakar cih girtibû.

Hevalê Rênas Roj hevalekî ji Rojhilat bû ku tevlî şoreşa Rojava bûbû. Dayik û bavê hevalê Rênas Roj sekneke gelekî bi rûmet nîşan dan. Beriya niha kurekî wan li Bakurê Kurdistanê şehîd ketibû. Dayik û bavê hevalê Rênas Roj bi rêzdarî silav dikim. Helwesta wan ji bo gelê me yê Rojhilat, ji bo tevahiya Kurdistanê helwesteke mînak e.

Li Rojava sîstemeke civakî tê avakirin ku dikare bersivê bide krîzên tevahiya mirovahiyê. Neteweya demokratîk bi pêşengiya jinan li her qada jiyanê tê avakirin. Bi esasî êriş li dijî vê yekê ye, lê belê dewleta Tirk wê ji van êrişan nikaribe encamê werbigire. Ji ber ku sîstem û felsefeya Serok Apo xwe dispêre berxwedan û xweparastinê. Mirovek bi tenê jî ma be ku baweriya xwe bi Serok Apo anî be wê li ber xwe bide. Sîstema modernîst kapîtalîst neçar e xwe biguherîne. Naxwe wê bi temamî hilweşe. Sîstem serwer bi kontrolkirina Rojhilata Navîn, Kurdistanê dixwaze temenê xwe dirêj bike. Halbûkî vê sîstemê ji mêj ve îflas kiriye. Gel, jin xwedî berxwedan, rêxistinî û yekîtiyê ne. Ji ber vê yekê jî yên bi ser bikevin hêzên demokrasî û azadiyê ne.”

‘JIN Û GELÊ EFGAN KIRIN QURBANÊ ŞERÊ JINÛVE AVAKIRINA HEVSENGIYAN’

Endama Koordînasyona KJK’ê Besê Erzîncan rewşa li Efganistanê jî nirxand û got, “DYE’yê hêza xwe ya berê winda kir, rola xwe ya pêşengiyê ya li cîhanê bi dawî dibe. Modela netewe dewletê êdî li cîhanê nayê. Polîtîkayên sîstema modernîst kapîtalîst felaket anî serê cîhanê. Li cîhanê, li dijî dewlet û desthilatdariyan, hema hema li her cihî nerazîbûna civakan, jinan, ciwanan gihîştiye asta herî bilind. Di pêvajoya vîrûsa koronayê de ev bêhtir mezin bûye. Serdana serokdewletê Fransayê ya li Iraqê divê weke jinûve rêxistiniya hêzên navneteweyî li cîhanê bê nirxandin. Fransa di vê mijarê de bi însiyatîf tevdigere. Di vir de ya esasî hêz û rêxistiniya xwe bi xwe ya gelan e.

Lewma sîstema hegemonîk li pey pergaleke nû ya cîhanê ye. Hewl dide temenê xwe yê li ber qedandinê ye, dirêj bike. DYE bi vekişîna ji Efganistanê ev xak ji Talîbanê re hişt. Di vir de lawaziya navxweyî, zehmetiyên aborî yên navxweyî yên DYE’yê hebin jî, plana esasî ew e ku DYE dixwaze Rûsya, Çîn û Îranê bi Talîbanê bide mijûlkirin û lawazkirin. Îran di hedefê de ye. Tê xwestin ku pergaleke nû ya cîhanê li ser vê bingehê bê avakirin. Jin û gelê Efgan di jinûve avakirina hevsengiyan de qurbanî vî şerî hatine kirin.

Emerîka dema ku kete nava Efganistanê, dirûşma xwe ya bingehîn azadkirina jinên Efgan bû, lê niha rewş berevajî vê ye. DYE’yê nekarî li Efganistanê planên xwe bixe meriyetê, bi polîtîkayên xwe nehişt ku hêzeke azadîparêz a alternatîf bê afirandin. Dawiya dawî jî jin û civak rastî yek ji hêzên herî paşverû yê cîhanê radestî Talîbanê kirin.

Ji ber vê yekê pêwîstî pê heye ku polîtîkayên DYE’yê yên têkildarî jinê hîn bi kûrahî bê nirxandin. Serokê DYE’yê Biden herî zêde bi gotinên li ser azadiya jinê tevgeriya. Li nava desteya xwe cihekî berfireh da jinan. Alîkara wî jî di dîroka DYE’yê de yekemcar jineke reş e, Kamala Harrîs e. Lê belê li aliyê din li DYE’yê rêxistiniyeke azad a jinê nîne ku ji bingehê ve rabe. Lewma nikare qala hebûna rêxistiniyeke berfireh bê kirin a ku hêz, reng, fikrê jinê li ser bingeha tevlîbûn û pîvanên demokratîk diparêze. Yanî meclîsên jinan nîne ku karibe jinên li nava desthilatdariyê bi rê ve bibin. Ev jî dibe sedem ku jin bikevin nava sîstemê û bi hin rol û mîsyonan rabin jî ev ê tenê şexsî be, sembolîk be. Cewhera sîstemê yanî çerxa mêtingeriyê ya li dijî jinan tê parastin. Nêzîkatiyek heye ku bi tevlîkirina jinan li nava sîstemê dixapîne. Îro gelek tevgerên jinan jî li DYE û Ewropayê vê sîstema ku azadiya jinê berevajî dike û dişibe mêr, lêpirsîn dike. Lewma koletiya jinê ya kûrkirî bi berfirehî tê nîqaşkirin. Di binê sedema hiştina Efganistanê ji Talîbanê re zîhniyeta mêr ê serwer heye.”

‘JINÊN KURD Û EFGAN DIVÊ BI HEV RE TÊKOŞÎNEKE HEVPAR BIMEŞÎNIN’

Besê Erzîncan destnîşan kir ku divê jin hemû giraniyê bidin ser xeta azadiya jinê ya rasteqîn û wiha dewam kir, “Bendewariya ji Emerîkayê, xwegirêdana bi Emerîkayê ve tê wateya xwegirêdana bi mêr ve. Lewma divê jin rêxistiniya xwe, sîstema xwe ya parastinê, tifaqên xwe, hevkariyên xwe bi xwe bi pêş ve bibe. Divê jin li her qada jiyanê biryarên têkildarî xwe bi xwe bidin û sîstemeke bi vî rengî bê avakirin ku jin têra xwe bikin. Di vê mijarê de Rojava mînakeke balkêş e. Mîna YPG û YPJ ên Rojava jinên li Efganistanê û herêmê divê karibin sîstema xwe ava bikin. Lewma jinên Kurd û jinên Efgan divê karibin bi hev re têkoşîna hevpar bimeşînin û ji hev hîn bibin. Di vir de jî wezîfeyên mezin dikevin ser tevgerên jinan ên li Rojhilatê Kurdistanê. Jinên Kurd divê hem ji bo jinan hem jî ji bo gelan bi rola xwe ya pêşengiyê rabin.”

‘EM XWE PERWERDE, ZANE, BIRÊXISTIN BIKIN, ÇALAKIYAN LI DAR BIXIN’

Besê Erzîncan di dawiya axaftina xwe de diyar kir ku gel, jin û ciwanên Kurd di demeke giran a pratîkê de ne û got, “Em ê sedsala 21’ê bikin sedsala jinê, sedsala azadiya gelan. Eger em karibin rêxistiniya xwe xurt bikin, em ê karibin li ser bingeha azadiyê ji nava kaos û krîzê rizgar bibin. Derfetên vê yekê ji her demê bêhtir zêde ne. Em van derfetan bibînin û li ser vê bingehê bi ruhê demê têbikoşin. Yê bi ser bikeve teqez wê em bin. Em di demeke welê de ne ku berxwedan, rêxistiniyê herî zêde dikarin bi pêş bixin. Rêberê me 23 sal in tecrîdkirî ye. Beriya her tiştî li ser bingeha azadiya Rêberê me, pêngava me ya ‘Dem dema azadiyê ye’ heye. Ji bo tecrîda li ser Rêberê me bê rakirin, ji bo misogerkirina azadiya fîzîkî ya Rêbertî, divê em hîn bêhtir û hîn bi bandor bixebitin.

Li ser vê bingehê bang li gelê me, jinan, ciwanan û dostan dikim ku bi xurtî xwedî li Rêbertî derkevin. Azadiya Rêberê me di heman demê de azadiya jinan e.”

Besê Erzîncan destnîşan kir ku di asteke stratejîk de girîng e ku têkoşîna azadiya jinê bi xurtî bê meşandin, piştevaniya jinê, hevkarî û tifaqa jinan bê avakirin û got, "Divê em van pêk bînin. Ji bo vê jî bang li rêxistinên jinan, rêxistinên femînîst, siyasetmedarên jin, akademîsyen, hunermend, hiqûqnas û jinên ji her pîşeyî dikim. Em, yekîneyên jinan, rêxistiniyên wan mezintir bikin. Ji taxan, ji gundan dest pê bikin û komun, meclîsên jinan ava bikin. Divê jin li her derê rêxistinbûyî bin. Em dest ji rêbaza kar a burokratîk û elît berdin. Modelên rêxistinbûnê biafirînin ku li her kesî tên. Eger em rêxistinbûyî bin, xwe perwerde û zane bikin, hingî em ê karibin xwe bi xurtî biparêzin. Jiyana nû û alternatîf li gel zor û zehmetiyan bi biryardarî ava bikin.

Li ser vê bingehê bang li jinan hemûyan û gelê me dikim ku bi hişmendiyeke bilind, bi moral û motîvasyonê tevlî kar bibin û têkoşîna me mezin bikin. Jin pêşengên karên azadî, demokrasî û ekolojîk in. Li ser vê bingehê em rola xwe bi xurtî bi cih bînin. Em xwe perwerde, zane, rêxistinbûyî bikin û çalakiyan pêk bînin. Îrade û rengê jinê li ser vê bingehê diafire. Li ser vê bingehê jiyan û têkiliyên nû dikarin bên avakirin. Teqez bawer dikim ku em ê bi ser bikevin. Di têkoşînê de ji her kesî re serketinê dixwazim."