Ji damezrînerên PKK'ê Sakîne Cansiz (Sara), nûnera KNK'ê ya Parîsê Fîdan Dogan (Rojbîn) û endama Tevgera Ciwanan Leyla Şaylemez (Ronahî) di 9'ê Çileya 2013'an de li paytexta Fransa Parîsê hatibûn qetilkirin.

Endama Konseya Leşkerî ya YJA Starê Rojda Amed bi wesîleya salvegera komkujiya Parîsê ji ANF'ê re axivî.

Amed di şexsê Sara, Rojbîn û Ronahî de şehîd hemû bi minetdarî bi bîr anî û komkujiya li Parîsê bi tundî şermezar kir.

Amed anî ziman ku dewleta Tirk di sala 2013'an de tengav bû, lewma xwest bi Rêberê Gelê Kurd Abdullah Ocalan re hin hevdîtinan bike û got, "Ji ber ku Dewlet di gelek mijaran de xitimî bû. Pêvajoya şerê gel ê şoreşgerî weke ku tê zanîn li Kurdistanê rêveçûna şer guhertibû û bi ruhê fedayî li qadên şer welê li dijmin hatibû kirin ku nikaribe xwe tevbide. Bi çalakiyên gerîla, bi taktîkên cuda yên çalakiyan dijmin gelekî tengav bûbû. Di vî şerî de dijmin windahiyên giran da."

Amed bi bîr xist ku dewleta Tirk a tengav bûye xwest bi Ocalan re hevdîtinê bike û ji bo pêvajo bê guhertin dest bi avêtina gavan kir.

Amed got, "Rêberê me xwest bi rengekî rast vê pêvajoyê bişopîne û binirxîne. Ji bo pêkhatina pêvajoyê Rêberê me hin gav avêtin. Di demeke wiha de ku bi Rêberê me re hevdîtinên krîtîk hatin kirin, Komkujiya Parîsê kirin. Ji aliyekî ve xwestin bi Rêbertî re hevdîtinan bikin, li aliyê din jî komkujî xistin dewrê. Bêguman divê hedef û wateya vê yekê baş bê fêhmkirin. Ji aliyekî ve hevdîtin hebû, lê li aliyê din sê hevrêyên me yên jin bi rengekî namerdî şehîd xistin. Bi Komkujiya Parîsê re xwestin pêvajoya çareseriya siyasî ya ku Rêberê me da destpêkirin sabote bikin."

'SARA ÇANDA BERXWEDANÊ YA DERSIMÊ BÛ'

Amed destnîşan kir ku li gel vê yekê jî Ocalan bi biryardariyeke mezin hewl da pêvajoyê bimeşîne û got, "Rêber Apo bi têkoşîna xwe nîşan da ku ti tişt nikare me qels bike û di vê çarçoveyê de nêzî pêvajoyê bû."

Amed ragihand, qetilkirina her sê hevrêyên wan ji bo tevgera jinê windahiyeke giran bû û got, "Rêbertî ji bo hevala Sara digot, 'Têkoşîna Sara têkoşîna min e'. Dema ku ev komkujî pêk hat Rêberê me li ser komkujiyê nirxandinek kir û destnîşan ki rku ev komkujî li dijî gelê Dersimê komkujiyeke duyemîn e. Hevala Sara ji Dersimê bû û ji çanda berxwedanê ya Dersimê hatibû. Dibe ku mînaka herî mezin a zindî ya vê çanda berxwedanê bû."

Amed destnîşan kir ku di kesayetiya Sara de hewl dan derbê li jin ên azad û berxwedêr bixin û got, "Bi vê gavê re xwestin hem derbê li Rêbertî bixin, hem li tevgerê hem jî li tevgera jinê bixin. Ji ber vê yekê ev êriş ji aliyê dijmin ve bi berfirehî hate hesabkirin û ji bo derbeke giran li tevgera me bixin hate kirin."

'ROJBÎN Û RONAHÎ PÊŞENG BÛN'

Amed ji bo kesayetiyên têkoşer ên Fîdan Dogan (Rojbîn) û Leyla Şaylemez (Ronahî) jî got, "Hevala Rojbîn di asteke girîng de karên civakî û dîplomatîk dikir. Hevala Rojbîn bi sekn, tevlîbûna xwe û lêgerîneriya xwe ya ji bo gelê xwe dihate naskirin. Li ser vê bingehê têkoşîneke rast dimeşand. Bêguman bi vê êrişê re xwestin derbê li karên dîplomasiyê jî bixin. Hevala Ronahî hevaleke ciwan bû, bi coşeke mezin a ruhê şoreşê li qadên ciwanan dixebitî. Hevala Ronahî bi sekna xwe pêşengiya şoreşgerî ji ciwanan re dikir."

'EM BI ŞEHADETÊ QELS NABIN'

Endama Konseya Leşkerî ya YJA Starê Rojda Amed di dawiya axaftina xwe de got, "Hevala Sara bi jiyan, têkoşîna xwe ji bo me pîvana jiyana azad e. Rastiya wê ji bo me pîvana berxwedan û têkoşînê ye. Bi vê êrişa namerdî re dibe ku dijmin hevala Sara bi awayekî fîzîkî ji nava me biribe lê belê bi hezaran Sara, Leyla û Fîdan derketin holê. Bi hezaran milîtanên fedayî hene ku li ser şopa wan dimeşin. Dijmin ti carî bi şehadetan nikare me qels bike. Piştî her şehadetê hêrsa me ya li dijî dijmin zêdetir dibe, daxwaza me ya ji bo têkoşînê xurtir dibe û biryardariya me mezintir dibe. Em tevgereke welê ne ku bi van nirx û hestan hene. Dijmin çiqasî bi rengekî qirêj êriş dike bila bike, xeta me ya berxwedanê ya li ser şopa şehîdan mezin dibe her tim bersiva pêwîst da, wê bide. Çi dibe bila bibe em ê li dijî êrişan hemûyan li ber xwe bidin û li ser şopa şehîdan her bimeşin. Bi navê gerîlayên YJA Starê bersiva me wê her tim mezinkirina berxwedan û têkoşînê be. Em ê mîrateya berxwedanê, ala berxwedanê ya şehîdên xwe bi şer û têkoşîna xwe bi ser bixînin. Bi sekneke hîn bi xurt û bi ruhekî fedayî em ê beşdarî têkoşînê bibin, tola şehîdên xwe hilînin û bi xurtkirina berxwedanê bi ser bikevin."