Bi wesîleya 25’ê Mijdarê Roja Têkoşîna Navneteweyî ya li dijî Tundiya li ser Jinê li paytexta Norweç Osloyê jin meşiyan.

Çalakî li Qada Sentral a Oslo ji aliyê Platforma Jinên Kurd a Norweç û saziyên jinên Norweçî ve bi rengekî hevpar hate lidarxistin. Çalakî ji bo hemû jinên hatine qetilkirin, bi deqeyek rêzgirtinê destpê kir. Parlamentera Kurd Seher Aydar di çalakiyê de axivî û li dijî tundiyê banga yekîtiyê li jinan kir.

Piştî axaftinan meş ji stasyona trenê ya navenda Osloyê destpê kir û heta ber parlamentoya Norweçê dewam kir.

Jinên ku bi meşaleyan meşiyan, wêneyên Sakîne Cansiz, Leyla Şaylemez, Fîdan Dogan û Evîn Goyî yên li Parîsê hatine qetilkirin, hildan.

Di tevahiya çalakiyê de dirûşmeya “Jin Jiyan Azadî” hate berzkirin.

MUNÎH

Li bajarê Munîh ê Elmanyayê bi wesîleya 25’ê Mijdarê Roja Têkoşîna Navneteweyî ya li dijî Tundiya li ser Jinê, Elmanan çalakî lidar xistin. Jinên Kurd jî bi cil û bergên xwe yên herêmî, beşdarî çalakiyê bûn. Di çalakiyê de dirûşmeya “Jin Jiyan Azadî” hate berzkirin û daxuyaniya Tevgera Jinên Kurd a Ewropayê (TJK-E) jî hate xwendin.