Kongreya Civakên Demokratîk a Kurdistaniyên li Ewropayê (KCDK-E), destnîşan kir ku têkoşîna gelê Kurd û gelên Rojhilata Navîn a azadî û rûmetê îro gihiştiye qonaxeke nû û got, “Banga Rêber Apo ya bi dîmen ji bo gelê me bûye hêvî, cihê kêfxweşiyê û îradeya çareseriyê ya gelê me xurt kiriye.

Weke KCDK-E em careke din ji raya giştî re diyar dikin ku em li pişt banga dîrokî ya Rêber Apo ne û em amade ne li ser navê gel û civaka xwe berpirsyariyên xwe bicih bînin.”

ENCAMA TÊKOŞÎNA RÊXISTINKIRÎ YE

KCDK-E, diyar kir ku gelê Kurd di tevahiya têkoşîna xwe ya ji bo azadî û rûmetê de, bi dayîna bedelên giran li ber xwe daye, bi îradeya xwe ya cewherî li dijî polîtîkayên zilm û înkarê dîrok nivîsandiye û hêviyên azadiyê zindî hiştiye. KCDK-E got, “Ev qonax encama biryardarî, fedakarî û têkoşîna rêxistinkirî ya gelan e.

EM AMADE NE ERKÊN XWE BI CIH BÎNIN

Rêber Apo banga ‘Aştî û Civaka Demokratîk ji nû ve teyît kiriye, îradeya çareseriya demokratîk û azadiyê bi biryardarî nîşan daye. Ev bang; ne tenê ji bo gelê me û tevgera me, ji bo gelên Tirkiyê, Rojhilata Navîn û hemû hêzên demokratîk hatiye kirin. Weke ku Rêber Apo destnîşan kir, aştî û çareserî bi hewldanê yekalî pêk nayê, divê her kes berpirsyariyên dikeve ser milên wan bi cih bîne. Em ê jî ji bo siberoja gelê xwe û tevahiya gelan, erka xwe bi cih bînin.

DIVÊ JI BO AŞTIYÊ GAV BÊN AVÊTIN

Weke gelê Kurd û dostên me yên li Ewropayê dijîn, em xwedî li banga Rêber Apo ya di 27'ê Sibata 2025'an de daye destpêkirin derketin û em ê ji niha û pê ve jî hê bi xurtî xwedî lê derkevin. Em dizanin ku pêvajo bi hewldanên yekalî pêk nayê û divê hemû alî berpirsyartiyên xwe bînin cih. Banga me li dewleta Tirk û hemû saziyên pêwendîdar ew e ku werin ser rêya çareseriyê ya ku Rêber Apo destnîşan kiriye û ji bo aştiyê gavan biavêje.

Em bang li gelê xwe yê li her deverê dikin ku bi vî ruhî xwedî li vê têkoşînê derkevin, hevgirtinê mezin bikin û bi xurtî tevlî pêvajoyê bibin.”