15’emîn Festîvala Çanda Dersimê ya Ewropayê ku bi dirûşmeya “Ma ne Xorasan, ma ne Tunceli! Ma Dersim me! (Em ne ji Xorasanê ne û ne jî ji Tunceliyê ne, em ji Dersimê ne), li qada Rebstockpark a Frankfurt a Elmanyayê tê lidarxistin, di roja 2’yan de bi coşekî mezin dewam dike.

Di festîvalê de ku bi armanca berxwedana li dijî asîmîlasyonê û parastina nirxên candî tê lidarxistin, tiştên aîdê çanda Dersimê, wêneyên şexsiyetên dîrokî, standên îmzeyê yêm nivîskaran û xwarinên Dersimê hatin pêşandan.

Festîvala ku bi beşdariya zêde destpê kir, di saetên siharê de piştî panela ‘’Di pirsgirêka jinan de qirkirina zayendî û baweriyê’’ bi axaftina Pîr Zeynel Kete û torena gulbang hate vekirin. Pir  Kete di axaftina xwe de îşaret bi cewhera aştiyê ya Elewitiyê kir û diyar kir ku ev nirx kevirê bingehîn ê civaka Elewî ye. Her wiha komkujiyên ku civaka Kurd û Elewiyên Kurd di tevahiya dîrokê de rûbirû mane bi bîr xist.

Festîval piştî axaftina vekirinê bi pêşandana govendê û koma muzîkê ya DAKME’yê dewam kir.

Parlementera DEM Partî ya Dersimê Ayten Kordû di festîvalê de axivî û bal kişand ser biryara fesihkirinê ya PKK’ê û diyar kir ku pêvajoyekî girîng û dîrokî ye. Ayten Kordû di dewama axaftina xwe de kadroyên pêşeng ên PKK’ê Alî Haydar Kaytan û Riza Altûn bi bîr anî û wiha got: “Dersimî du ewladên xwe yên leheng winda kir. Ez du rêwiyên heqîqetê bi rêzdarî û hezkirin bi bîr tînin.”

Ayten Kordû bi berdewamî bal kişand ser Banga Aştî û Civaka Demokratîk û bang li hemû beşên civakê kir ku li dora vê bangê kom bibin û civaka demokratîk ava bikin.

Ayten Kordû îşaret bi komkujiyên li ser Elewiyan ên li Dersimê kir û wiha got: “Zihniyeta komkujiya Elewiyan ku di tevahiya dîrokê de dewam kir hîna jî zindî ye.”

Piştre Şaredarê Depê Cafer Ugur axivî û diyar kir ku festîval ne tenê çalakiyekî çandî ye di heman demê de bibîrxistina êş û berxwedanên dîrokî ya Dersimê ye.

Şaredar Cafer Ugur ev bang li ciwanan kir û wiha got: “Berê xwe bidin Dersimê û li wê derê jiyan bikin. Hêvî dikin ku em bi pêvajoya nû re li Kurdistana ku komkujî û şer lê bi dawî bûne, bicivin.”

Piştî ku li ser navê Komîteya Amadekar a Festîvalê Muharrem Erdogan spasiya her kesên ku keda wan di festîvalê de çêbûye kir û spasiya girseyê kir, bername bi dawî bû.