Şandeya ji Hevseroka Giştî Tulay Hatîmogûllari, Berdevka DEM Partiyê Ayşegul Dogan, Hevberdevkê Komîsyona Têkiliyên Derve Berdan Ozturk, Alîkara Hevserokên Giştî Ozlem Gunduz, Nûnerê Strasbourgê yê DEM Partiyê Fayîk Yagizay û Nûnerê Brukselê yê DEM Partiyê Eyyûp Dorû, di navbera 30'ê Îlonê û 3'ê Cotmehê de li Strasbourgê hin hevdîtinên dîplomatîk kir.

Şandeya DEM Partiyê tevlî civîna Koma Çep a li Meclîsa Parlamenteran a Konseya Ewropayê (MPKE) bû û Tulay Hatîmogûllari li vê derê axivî.

Şandeyê her wiha bi Dîrektorê Giştî yê Têkiliyên Derve û Siyasî yê Konseya Ewropayê Miroslav Papa, Seroka Komîteya Şopandinê ya KE'yê Zanda Kalnina-Lukas, Serokê Koma Kesk û Sosyal Demokrat a KE'yê Frank Schwabe, Serokê MPKE'yê Thedoros Rousopoulos, Sekreterê Giştî yê KE'yê Alain Berset û Dîrektorê Giştî yê Karên Hiqûq û Mafên Mirovan ê KE'yê Gianluca Esposito re hevdîtin kir.

Li gorî Buroya Çapemeniyê ya DEM Partiyê di hevdîtinan de li ser mijarên bicihneanîna biryarên Dadgeha Mafên Mirovan a Ewropayê, pirsgirêkên di serweriya hiqûqê, demokrasiyê û mafên mirovan ên li Tirkiyeyê, tecrîda giran a li Îmraliyê, raporên CPT ên li ser mijarê û çareseriya demokratîk a pirsgirêka Kurd nêrînên partiyê hatin parvekirin.

Di hevdîtinê de hate destnîşankirin ku hewldanên DEM Partiyê yên ji bo têkiliyên navbera Tirkiye û welatên endamên Konseya Ewropayê bi rengekî şefaf û demokratîk bêne meşandin, wê hewldanên xwe dewam bikin.

Şandeya bi serokatiya Tulay Hatîmogûllari piştre li Strasbourgê bi hilbijêrên DEM Partiyê re li hev civiya û bûyerên li Tirkiyeyê û herêmê nirxand.