Iraq û Başûrê Kurdistanê di bin bandora hewaya baranê de ne. Li Başûrê Kurdistanê karesatên lehiyê rû dan, li bajarê Babîlê ya Iraqê di sê bûyerên cuda de 3 kesên 16, 22 û 30 salî ji ber lêxistina ceyranê jiyana xwe ji dest dan.

Li gorî rayedarên xwecihî, qurbanî ji tirsa ku hewaya xirab wê zirarê bide amûrên elektronîk, ji bo ceyrana malên xwe bibirin derketine derve.

Serokwezîr Şîa El Sûdanî ji ber "şert û mercên avhewayê xerab" ferman da ku li seranserê welêt, ji xeynî ewlehî û hin karûbarên giştî, saziyên îdarî bên girtin.

Li Başûrê Kurdistanê gundê Xebat di bin avê de ma. Şêniyên gund xebatên paqijkirina ava herî didomînin.

Iraq ev 3 sal in bi ziwabûneke dijwar re rû bi rû maye û baranek kêm dibare. Barana kêm bi taybetî cotkaran kêfxweş dike. Lê ji ber nebûna binesaziyê li vî welatê petrolê dewlemend û Başûrê Kurdistanê, baran dibe sedema lehî yan jî qutbûna ceyranê.

Neteweyên Yekbûyî, Iraqê yek ji pênc welatên herî qels ên hemberî bandorên germahiya global dibîne.

Di dawiya Sibatê de, rayedaran ragihandibû ku asta avê ya li başûrê Dîcle û Firatê ku du çemên mezin ên ku di welat re derbas dibin gelek daketiye. Hikûmet vê bûyerê bi ziwabûn û bi taybetî jî bi bendavên ku li jor her du çeman ji aliyê her du welatên cîranên mezin Tirkiye û Îranê ve hatine çêkirin ve girêdide.