Navenda Ragihandinê ya YPG'ê, li ser bîlançoya şerê meha Tebaxê daxuyaniyeke nivîskî weşand.

Di daxuyaniyê de hat gotin, "Hêzên me Yekîneyên Parastina Gel (YPG) û Yekîneyên Parastina Jinê (YPJ) ku tevahiya Rojava diparêzin û li Bakurê Suriyeyê bi pêşengtiya Hêzên Sûriyeya Demokratîk (QSD), li Reqayê şerekî dijwar li dijî DAIŞ'ê dimeşînin, meha Tebaxê ya 2017'an jî bi aktîf tevgeriyan û di vê mehê de jî pêşî li armancên dijminan girtin."

Di daxuyaniyê de, li ser encama şerê meha Tebaxê yê navbera hêzên wan û artêşa Tirk a dagirker û çeteyên wê de, ev agahî hatin dayin:

"Artêşa Tirk a dagirker û çeteyên wê 158 carî bi tang, topên hawanê, obus û bi çekên giran êrîşî çeperên YPG-YPJ'ê û zeviyên sivîlan kirin.

Balafirên şer û keşfê yên girêdayî artêşa Tirk a dagirker 8 caran ji sînorê rojava derbas bûn û bi armanca keşfê li ser asîmana Rojava de geriyan.

Artêşa Tirk a dagirker 2 caran ji sînor derbas bû nava xaka Rojava.

Artêşa Tirk a dagirker û çeteyên wê, 2 caran ji bejahî ve êrîşî hêzên me kirin.

Di encama topbarana artêşa Tirk a dagirker de 7 sivîl birîndar bûn.
 
Di encama topbarana artêşa Tirk a dagirker û çeteyên wê de zerarê madî gihişt sivîlan. Mal û zeviyên sivîlan hatin şewitandin

Hêzên me yên YPG-YPJ’ê li hember van êrîşan di çarçoveya parastina rewa de 34 caran bersiv daye. Di derbarê wê de:
 
6 ÇETEYÊN ARTÊŞA TIRK A DAGIRKER HATIN KUŞTIN, GELEK MAŞÎNÊN WAN HATIN RÛXANDIN

6 çeteyên girêdayî artêşa Tirk a dagirker hatine kuştin.
 
Tangek, maşîneyek bombebarkirî, maşîneyek doçka barkirî û tirêksekî çeteyên girêdayî artêşa Tirk hatin rûxandin. Her wiha maşîneyek çeteyan û tirêksekî artêşa Tirk a dagirker hat derbkirin.
 
2 balafirên keşfê yên artêşa Tirk û çeteyên wê hatin xistin û ketin destê hêzên me.
 
LI EFRÎNÊ 4 HEVRÊYÊN ME ŞEHÎD BÛN

Di vê mehê de encama topbarana artêşa Tirk a dagirker de li Efrînê 4 hevrêyên me gihiştine şehadetê.
 
Hêzên me yên YPG û YPJ'ê jî di nav de ji bo rizgarkirina bajarê Reayê ji destê çeteyên DAIŞ’ê 'Pêngava Rizgarkirina Reqa' hatibû destpêkirin di meha Tebaxê de jî bi biryarbûnekî xurt tevlî bûye û tevgeriya ye. Di vê mehê de di pêngavê de pêşveçûyînên şervanan li gor mehên din hîn xurttir bû û serketinên mezin hatine bidestxistin.

LI REQAYÊ, MEHA TEBAXÊ ZÊDEYÎ 2 HEZAR SIVÎL HATIN RIZGARKIRIN
 
Li ser vê bingehê encamên sereke yên pêngavê di vê mehê de wiha ye:
 
Li çar aliyên bajarê Reqqayê ku hatiye dorpêçkirin heya niha ji %65 hatiye rizgarkirin.
 
Nêzikî 2 hezar sivîlên ku destê çeteyan de asê mabûn ji aliyê Tîmên Taybet yê QSD’ê ve hatin rizgarkirin û gihandin cihên bi ewle.
 
9 TAX HATIN RIZGARKIRIN, 1244 ÇETEYÊN DAIŞ'Ê HATIN KUŞTIN

Di vê mehê de 9 tax hatin rizgarkirin. Taxên hatine rizgarkirin ev in: Reqqaya Kevin, Nezlit Şihadê û Hîşam Bin Ebdulmelik ên dikevin başûrê bajêr, Taxa El Kerîm a bakur rojavayê Reqqayê, taxa Diriyê a rojavayê bajêr, taxa Mehdî, taxa El-Refqa, taxa Mensur taxa Reşîd yên aliyê rojhilat ên Reqqayê. Her wiha gelek cihên stratejîk jî hatin rizgar kirin.
 
Di vê mehê de baskên Rojava û Rojhilatê Reqayê gihiştin hev.
 
1244 çeteyên DAİŞ’ê hatine kuştin û bi dehan çete hatine brîndar kirin. Ji van 76 termên çeteyan ketine destê şervanan.
 
3 çete bi saxî hatine girtin.
 
28 maşîneyên teqemeniyê berîya ku bigihîjin armancên xwe ji aliyê şervanan ve hatin îmha kirin.
 
Kargeha sereke ya çêkirina mayînan, fabrîqeyeke çêkirina erebeyên bombebarkirî, 3 maşîneyên leşkerî, 3 doçka 12,5 û doçkayek 23 hatin rûxandin û balafirekî keşfê hat xistin.
 
Di vê mehê de şervanan gelek çek û cebilxane li ser çeteyan girtin. Her wiha cihên ku mayin û hawan dihatin çêkirin ketin destê şervanan.
 
Sê tunelên çeteyan ku ji bo hatin çûyînê şixulandin hatin dîtin û cihên ku hatin rizgarkirin ji aliyê tîmên taybetan ji mayinan hatin paqijkirin.
 
LI REQAYÊ 101 ŞERVAN ŞEHÎD BÛN

Di meha tebaxê de Pêngava Rizgarkirina Reqayê de 2 ji wan şervanên YPJ 101 şervanên me bi lehengî şer kirine û gihîştine şehadetê û li hember êrîşên çeteyên DAIŞ’ê li ser navçeya Şedadê de 8 şervanên me tevlî karwanên şehîdan bûne. Her wiha yek ji wan şervanekî YPJ’ê 5 şervanên me di encama qezayan û 3 şervanan me jî bi nexweşiyên giran şehîd ketine.