Îro bi sedan şêniyên bajarê Hesekê bi tevlêbûna endamên saziyên sivîl ên navçe û kantonê berê xwe da konê sersaxiyê yê şehîd Xalid Zewba Oso yê li taxa Miftî ya Hesekê. Di merasîma sersaxiyê de endama Meclîsa Malbatên Şehîdan a Kampa Waşûkanî Ayda Semo wiha axivî: "Bi êrîşên domdar ên dagirkeriya ên Tirk li dijî hêzên me yên Rojava û li çiyayên Kurdistanê, îrade û berxwedana me kêm nabe."

Ayda diyar kir ku ew xwe dispêrin xwe û hêzên xwe û got: “Em xwe naspêrin Emerîka, Rûsya yan jî dewleteke din. Bi berxwedana xwe û bi piştgirî û sekna hevpar, em ê dagirkeriyê têk bibin."

Endamê Meclîsa Malbatên Şehîdan a Kantona Hesekê Hemîd Hisên jî wiha got: "Em serî li ber dijmin natewînin, em bê deng namînin û em nahêlin xwîna şehîdên me vala biçe."

Cenazeyê Şehîd Xalid Zewba Oso yê ku nîvê şeva Şemiya buhurî di encama bombebarana dewleta Tirk a dagirker a li ser embarên genim ên gundê Dehr El Ereb ê Zirganê de şehîd bû, duh li Goristana Şehîd Dijwar a gundê Dawidiyê yê Hesekê hat veşartin.