Partiya Yekitiya Demokratîk (PYD) duh li ser malpera xwe ya fermî ji ber salvegera Komkujiya Kobaniyê daxuyaniyek da. PYD’ê bi daxuyaniyê diyar kir ku komkujî nîşaneyeke din a hevkariya dewleta Tirk a bi DAIŞ`ê re ye.

Daxuyaniyê wiha bû: "Piştî ku Kobaniyê di 26`ê Çileya 2015`an de ji destê DAIŞ`ê hate rizgarkirin û hêzên YPG/YPJ`ê li başûr, rojava û bakurê Kobaniyê dan ser şopa DAIŞ’iyên mayî,  faşîzma Tirk û hevalbenda wê DAIŞ careke din ketin hewila dagirkirina Kobaniyê.’’

‘PIRÊ ŞEHÎD Û BIRÎNDARAN ZAROK Û JIN Û KAL Û PÎR BÛN’

Di dewama daxuyaniyê de wiha hat gotin: “Ber destê sibeha 25`ê Hezîrana 2015`an rêxistina terorîst a ji sedan çeteyan pêkhatî û hin ji wan jî di ser sînorê bakur re hatibûn êrîş birin bi ser Kobaniyê da. Di encama vê êrîşa li ser Kobaniyê û gundê Berxbotan ê başûrê bajêr de 253 welatî şehîd bûn û zêdeyê 273 kesan jî birîndar bûn. Şehîd û birîndar bi piranî jin û zarok û kal û pîr bûn.’’ Ev jî nîşaneyeke din a hevkariya Tirkiyê û DAIŞ`ê ye."

 ‘ÇETE LI XWE MIKUR HATIN KU ÊRÎŞ PLANÊ DEWLETA TIRK BÛYE’

Di berdewamiya daxuyaniyê de ev hate destnîşankirin: "Tevî ku dagirker bi bin ketine jî ev rêbaz gelek caran bi kar anîne. Bi êrîşên herî dawîn ê bi ser Girtîgeha Sînaa ya Hesekê de xwestin DAIŞ`ê zindî bikin û bikin serwerê herêmê. Lê bi saya berdêlan û zêdeyê 120 şehîdan bi ser neketin. Dema ku QSD`ê terorîst girtin û dest bi lêpirsînê kir, çete li xwe mikur hatin ku êrîş planekî dewleta Tirk bûye.’’

Di dawiya daxuyaniya xwe de, Meclisa Giştî ya PYD`ê şehîdên Komkujiya Kobanê bi bîr anîn û soza hilanîna heyfa hemû şehîdan da.