Şandeyeke MSD’ê bi serokatiya hevseroka meclisê Leyla Qereman, serdana serokê taîfeya durziyan a li Siwêdayê Şêx Hikmet El Hicrî kir.

Şandeya MSD’ê ji cîgirê hevserokatiya meclisê Elî Rehmûn, endama Buroya Jinan Janda Remo, sekreterê giştî yê Partiya Lihevkirina Demokratîk a Kurd Fewzî Şengalî û endamên Desteya Siyasî ya Karên Nîştimanî û Demokratîk pêk dihat.

Di hevdîtinê de rewşa Sûriyeyê ya piştî rûxandina rêjîma Baasê hate gotûbêjkirin. Beşdaran behsa rewşa aloz a welêt û zehmetiyên ku gelê Sûriyeyê dikişîne kir.

Beşdaran teqezî li ser girîngiya parastina aştiya sivîl û pêşîgirtina ku tundiyê û şer kir. Her wiha teqezî li ser girîngiya yekitiya xaka Sûriyeyê kir.

Beşdaran ezmûna Rêveberiya Xweseriya Demokratîk wek modeleke nenavendîbûnê nirxand û diyar kir ku ev nimûne dikare bibe bingeha avakirina Sûriyeya siberojê ku nûneratiyeke dadmend û berfireh ji bo hemû herêm û pêkhateyan pêk bîne.

Her wiha teqezî li ser xurtkirina peywendiyên di navbera pêkhateyên Sûriyeyê û xebatên ji bo lidarxistina kongreyeke nîştimanî ya berfireh de hate kirin.

Di dawiya hevdîtinê de beşdaran girîngiya yekitiya nîştimanî û peydakirina çareseriyên siyasî yên ku daxwazên gelê Sûriyeyê pêk bînin, anîn ziman.