Hesen Birko (Bavê Şehîd Şîlan) li ser berxwedan û qehrematiya ku gerîla li çiyayên azad nîşan dide û destekdayîna wan a ji gerîla re axivî û wiha dest bi axaftina xwe kir: ''Ev keç û xortên me yên ku li çiyayên azad li ber xwe didin, ne aşiqê xwîn û şerî bûn, ew aşiqê azadiyê ne û ji bo ku azadî û wekheviya xwe bi dest bixin îro li ber xwe didin. Ji ber wê jî  em çi qas qehremantiya wan bînin ziman jî kêm e û dîsa em nikarin mafê wan qehremantiyê bidin. Gerîla zarokên me ne, yên ku parastina rûmeta me dikin ew in. Li çiyayên azad, gerîlayên azadiyê ne tenê li ber xwe didin û şer dikin, di heman demê de di demsala herî zehmet de di wê zivistana sar de li ber xwe didin. Gerîlayên azadiyê tevî hemû şert û mercan jî operasyonên xwe yên li dijî dijmin pêk tînin û derbeyên giran li dijmin dixin.''

Hesen di berdewamiya axaftina xwe de diyar kir ku ew ji bo gerîlayên azadiyê çi bikin jî wê li hember keda wan kêm bimîne û wiha pêde çû:''Hemû berxwedan, qehremantî û îradeya di şexsê gerîla de tê nîşandan, pir biqîmet e. Gerîla hebûn û rûmeta gelê Kurd e û dijminekî weke dijminê gelê Kurd ku duyemîn endamê NATO'yê ye, li hemberî tekoşîna gerîla têk çûye. Em jî weke malbatên şehîdan heya dawiyê li kêleka gerîlayên azadiyê ne û tu carî wan tenê nahêlin. Çimkî dema ku  em gerîlayên xwe berdin em ê îxanetê li şehîdên xwe û zarokên xwe bikin.’’

Endama Rêveberiya Meclîsa Malbatên Şehîdan Emel Qehreman jî li ser berxwedana gerîla ya li Qadên Parastinê yên Medyayê  axivî û wiha got: ''Li çiyayên azad tevî wê zor û zehmetiyê gerîlayên azadiyê li hemberî her cûre teknîkên giran li ber xwe didin û tu carî teslîmiyetê qebûl nakin û gav şûnde ne avêtine. Em jî hêz û morala xwe ji wan digirin. Tevî ew qas zor û zehmetiyan gerîlayan bi tekoşîna xwe li seranserê cîhanê deng vedan. Çi ji me tê xwestin em amade ne ku bikin, ji ber ku em û gerîla hev temam dikin.’’

Di dawiyê de endama Komîteya Perwerdeya Saziya Malbatên Şehîdan Arêf Sîdo helwesta xwe bi van gotinan anî ziman: ''Berxwedana ku gerîla li çiyayên azad nîşan dide, berxwedaneke dîrokî û efsane ye û mînaka wê li seranserê cîhanê tune ye. Ji ber ku gerîla xwe weke hêzeke mirovî û berpirsiyarê nirx û exlaqa civakê dibîne. Ji ber vê yekê jî gerîla bê dudilî û baş dizane wê çawa li hemberî dijmin şer bike û derbeyên giran li dijmin bixe û serkeftinê ji gelê xwe re qezenc bike û gelê xwe ji hemû êrîşên dagirkeriyê re biparêze.’’

Arêf di berdewamiya axaftina xwe de anî ziman ku ew gerîlayan ji xwe re weke hebûnê dibînin û axaftina xwe bi van gotinan bi dawî kir:''Em gerîla ji xwe re weke ruh, cewher, rumet û hebûna xwe dibînin. Bi saya gerîla îro li seranserê Kurdistanê dîrokek qehremaniyê tê nivîsandin, ew in ku hêz û moralê didin gelê Kurd. Ji ber wê jî em hebûna xwe di hebûna gerîlayan de dibînin. Ew hêz û rûmeta me ne.’’