Şervanê QSD’ê Mistefa Efrîn (Xalid Mihemed Mihemed) ku 27’ê Sibatê li Şedadê şehîd bûbû, bi merasîmekê li Pakrewangeha Şehîdan a bajarê Tebqayê hat spartina axê. Bi sedan şêniyên kantona Tebqayê, koçberên ji Efrîn û Şehbayê, nûnerên Rêveberiya Xweser, Partiya Sûriyeya Pêşerojê, Meclisa Kombûna Jinan a Zenûbiya di merasîmê de amade bûn.

Di merasîmê de endamê Meclisa Olî ya Kantona Tebqayê Botan Şêx Hemo axivî û hin ayetên Quranê yên li ser şehadetê xwendin. Hemo anî zimanê ku cihê şehîdan li ba Xwedê yê herî bilind e û di dilê gelê xwe de zindî ne.

Hevserokê Nivîsgeha PYD’ê ya kantona Tebqayê Xalid Esker jî piştî sersaxî ji malbata şehîd re xwest, qala banga Rêber Apo kir û got: "Nameya Rêber Abdullah Ocalan me ber bi aştiyê ve dibe. Name ji me re dibêje ku em gel xwedî maf û destkeftî ne û me gelek berdêl dane. Şehîd Xalid jî îsbata vê yekê ye."

Xalid Esker soza şopandina rêya şehîdan da û got: "Em soz didin şehîd Xalid û tevahî şehîdên azadiyê ku em ê şopdarên we bin heya ku êrişên dewleta Tirk a dagirker û çeteyên wê li ser welat û gelê xwe bi dawî bikin.”

Piştî axaftinan wesîqeya şehîd Mistefa Efrîn hat xwendin û radestî malbata wî hat kirin. Cenazeyê şehîd bi dirûşme û tilîliyên dayikan spartin axê.