Bi sedan welatiyên herêma Keramê, nûnerên saziyên sivîl û hêzên leşkerî yên Reqayê cenazeyê şervanê QSD`ê Îsmaîl El-Îsa (Murad Reqa) li Goristana Şehîd Sêvdar a bajarokê El-Cedîdat veşartin.

Girseya gel cenazeyê şehîd ji ber Meclîsa Malbatên Şehîdan a Keramê wergirtin û bi kerwanekî wesayîtan ber bi Goristana Şehîd Sêvdar ya bajarokê El-Cedîdat ve ketin rê.

Li goristanê merasîm bi deqeyek rêzgirtina leşkerî ku ji aliyê şervanên QSD`ê ve pêk hat, destpê kir. Piştre endama rêveber a Meclîsa Malbatên Şehîdan Ruqeye El-Hemûd, yek ji fermendarên YPJ`ê Jîn Ehmed, endamê HPC`ê Silêman El-Ebid axivîn û sersaxî ji malbata şehîd re xwestin.

Di axaftinan de hate destnîşan kirin ku çeteyên DAÎŞ`ê di bargeha xwe ya dawî de, li gundê Baxozê nefsa xwe ya dawîn distînin û gotin: “Ji bo tunekirina hişmendiya DAÎŞ`ê li herêmê hevgirtina gel pêwîst e.” Axaftvanan soza şopandina rêya şehîdan dan.

Piştî bi dawîbûna axaftinan endama rêveber a Meclîsa Malbatên Şehîdan Îbtîsam El-Ehmed nasnameya şehîd xwend û radestî malbata şehîd kir.

Piştre jî Saziya Malbatên Şehîdan nasnameya 7 şehîdên Qonaxa Dawî ya Pêngava Bagera Cizîrê ya ‘Şerê Tinekirina Terorê’ eşker kir.

Navê şehîdan wiha ne:

Mihemed El-Abdullah (Raêd Keramê), Fadî El-Exres (Agirî), Mihemed El-Hemed (Mihemed), Elî El-Hemûd (Qemer Cewheriye), Telal Mehmûd (Zagros), Xelîl Hesen (Rustem) û Hemed El-Qati (Qendîl Himêrat).

Di dawiya merasîmê de girseya gel cenazeyê şehîd Ismaîl El-Îsa di nav tilîliyên dayikan û berzkirina dirûşmeyên silvakirina berxwedana QSD`ê de veşartin.