Saziyên Mafên Mirovan ên li herêma Efrînê diyar kirin ku lêkirina dîwarê li gundên Kîmar, Ceremîn û Cilbirê yê li Efrînê tê wateya ku Efrîn ji xaka Sûriyeyê were qutkirin.

Saziyan li Kampa Serdem a Şehbayê daxuyanî dan çapemeniyê û diyar kirin ku bi lêkirina dîwar re Efrîn ji xaka Sûriyeyê tê qutkirin û hewl tê dayîn ku Efrîn bibe herêmeke Tirkiyeyê.

Di daxuyaniyê de ev tişt hate diyarkirin:

“Dewleta Tirk di 20’ê Çileya 2018’an de teroreke hov li ser Efrînê kir û çekên qedexe bi ser sivîlan ve teqand. Efrînê li hemberî van êrîşan 58 rojan li ber xwe da û di 18’ê Adara 2018’an de Efrîn ji aliyê dewleta Tirk û çeteyên wê hate dagirkirin. Dewleta Tirk û çeteyên wê demografiya Efrînê guherand, gelê sivîl êşkence kir û mal û milkên gel talan kir. Ev êrîşên dewleta Tirk û çeteyên wê li dijî qanûnên navneteweyî ne.

Ji ber bêdengiya cîhanê dewleta Tirk dest bi lêkirina dîwarên dagirkeriyê kir. Ev dîwar li gundê Kîmar, Cilbir û Mêremînê tê kirin. Bi lêkirina van dîwaran re hewl tê dayîn Efrîn ji xaka Sûriyeyê were qutkirin û bibe parçeyekî axa Tirkiyeyê. Em saziyên mafên mirovan diyar dikin ku mafê dewleta Tirk tuneye ku têkeve Sûriyeyê û em bang li Sûriye û hemû dewletan dikin ku bila li hemberî axa Sûriyeyê bi cîddîyet tevbigerin. Ji ber ku dewleta Tirk dixwaze bûyera Lîwa-I El Iskenderonê li Efrînê dubare bike.”