Bi boneya salvegera 15’mîn ya serhildana Qamişloyê rêveberiya Xweseriya Demokratîk a Herêma Efrînê li Kampa Berxwedan a li navçeya Fafînê daxuyaniyek da çapemeniyê.

Di daxuyaniyê de ev tişt hatin diyarkirin:

“Di tevahî dîroka Sûriyeyê de Kurdan weke hemû pêkhateyên din ên Sûriyeyê, di rizgarkirin û avakirina Sûriyeyê de roleke mezin lîstin. Li dijî dagirkeriya Fransayê Yûsûd El Ezme, Îbrahîm Henano û bi dehan berxwedêrên din şer kirin.

Lê li beramberî wê , rejîma Beas bi siyaseteke nijadperest, demografî guherand. Bi vê siyasetê re bi deh hezaran Kurd bênasname man û di welatê xwe de biyan man. Erdên Kurdan hatin desteserkirin û radestî koçberên Ereb kirin ê ku li herêmê hatin bicihkirin. Di heman demê de navên gundên Kurdan guhartin û Kurd ji mafên xwe bêpar hatin hiştin.

Ev êrîş û siyaseta nijadperestî heta bi dema Qetlîama Qamişlo domiya. Di lîstikeke fûtbolê de êrîşî Kurdan hate kirin, bi dehan kes hatin qetilkirin, bi sedan kes birîndar bûn û hatin girtin. Lê ev hewldanên wan li hemberî doza me têk çû.

Îroj di mozaîka gelê Sûriyeyê de Kurd beşeke esasî ne û xebatên xwe yên dîrokî û niştimanî li ser esasê wekheviya gelan didomînin. Gelê Kurd ji bo avakirina Sûriyeyeke demokrat û pirçandî têdikoşin.”