Koordînasyona Kongra Star bi wesîleya 1’ê Mijdarê Roja Kobanê ya Cîhanê daxuyaniyek nivîskî weşand. Koordînasyonê Roja Kobanê ya Cîhanê silav kir û diyar kir ku şoreşa Rojava ji bo tevahiya cîhanê bûye hêviya azadiyê.

Di berdewama daxuyaniyê de ev tişt hate gotin: 

“Çeteyên DAÎŞ’ê bi desteka dewleta Tirk di sala 2014’an de bi armanca têk birina destkeftiyên gelê Kurd û gelên herêmê bi tang, top û çekên giran êrîşê Kobanê kirin. Li ber çavê cîhanê bi xeyalê dagirkirinê êrîş kirin. Lê wan ji bîr kiribû ku gelê Kobanê xwe bi fikir û ramanên azad yên Rêber Apo perwerde kiriye.”

Koordînasyona Kongra Star destnîşan kir ku gelê Kobanê û şervanên azadiyê 133 roj li dijî hovîtiya DAÎŞ’ê, berxwedanek bê hempa nîşan daye û got ku bi vê berxwedanê mohra xwe li sedsala 21’emîn xist.

Koordînasyona Kongra Star di şexsê şehîdên Kobanê de sembolên berxwedanê Arîn Mîrkan û Rêvan bi bîr anî û anî ziman ku li dijî destdirêjî, tundî, pergala kolekirinê û teslîmiyetê bi seknek fedaî bersiv dane êrîşan û berxwedana Kobanê kirin berxwedana ‘Jina Azad’.

Kongra Star destnîşan kir ku hêzên ku destekê didan çeteyên DAÎŞ’ê îro jî bi awayek hovane êrîşê destkeftiyên gelê Kurd dikin û wiha hate gotin, “Dewleta Tirk a ku têkçûn DAÎŞ’ê ti carî qebûl nekir, ji bo tolê rake, bi çekên kîmyewî êrîşê gerîla dike. Her wiha bêy navber li Bakûr, Başûr, Rojava û Bakûrê Sûriyeyê êrîşê gelê Kurd dikin. Armanc qirkirine. Tevahî mirovahî çawa ku di 1’ê Mijdarê de roja piştevaniya berxwedana cîhanî ya Kobanê hatin cem hev û bûn yek, divê îro jî ji bo parastina rûmeta mirovahiyê bi ruhê Kobanê xwedî li şoreşa gelên azadîxwaz bê derketin.”