Ji bo gerîlaya Hêzên Parastina Gel (HPG) Dîlan Eşref (Xwînda Dilbirîn) ya di 17’ê Hezîrana 2022’an de li Herêmên Parastinê yên Medyayê şehîd bû, li Goristana Şehîd Dijwar a li gundê Dawûdiyê ya Hesekê merasîm hate lidarxistin. Bi sedan welatiyên Kantona Hesekê û sazî tev li merasîmê bûn. Di merasimê de wêneyên Şehîd Xwînda Dilbirîn hatin hildan.

Di merasîmê de ewilî endama rêveber a Meclîsa Malbatên Şehîdan a Hesekê Zozan Hesekê axivî û bal kişand li ser berxwedana gerîlayên YJA Star û HPG′ê ya li hember êrîşên artêşa Tirk a dagirker  û got: “ Tu kes nikare li pêş vîn û hêza jinên azad ku di oxira azadî û rûmeta gelê xwe de tê dikoşin, bisekine."

Zozan bang li gelên li Kurdistanê kir ku li ber xwe bidin û got: “Dijmin nikare me têk bibe yan jî vîna me bişikîne. Ji ber ku em xwe dispêrin fikir û felsefeya Rêberê Gelê Kurd Abdullah Ocalan. Em ê heta serkeftinê li ser şopa şehîdan bin."

Ji fermandarên YPJ′ê Dilbirîn Kobanê jî axivî û got: "Dijmin nikare vîna hêzên me yên leşkerî yan jî vîna neteweya demokratîk bi rêya êrîşên wê yên hovane bişikîne û nikare li hember fedaiyên vî welatî bisekine. Em ê bi hevgirtin û berxwedana xwe gel û vê xakê biparêzin."

Bavê Şehîd Xwînda Dilbirîn, Mihemed Eşref jî axivî û got: “Em ê heta serkeftinê li hember dijmin bitêkoşîn û timî şopdarên rêya şehîdan bin.“

Di dawiyê de endama Meclîsa Malbatên Şehîdan a Hesekê Rojda Ehmed wesîqeya şehîd xwend û radestî malbatê kir.

Merasîm bi dirûşmeyên “Şehîd namirin“ bi dawî bû.