Yekîtiya Êzîdiyên Efrînê li bajarokê Til Rifet a kantona Şehbayê, bi xwepêşandanekê nerazîbûna nîşanî hewldanên hêzên PDK'ê yên ketina ‎Şengalê dan.‎

Xwepêşandan ji navenda navçeya Til Rifetê destpê kir û li kolanên bajarokê geriya. ‎Xwepêşandêran alên Yekîtiya Êzîdiyan hildan û dirûşmeyên şermezarkirina sûcên PDK'ê ‎berz kirin.‎

Xwepêşandan li çarxereya şehîdên komkujiya Til Rifetê ya navenda navçeyê vegerî mêtîngê. ‎Çalakî bi deqeyek rêzgirtinê destpê kir, piştre li ser navê Yekîtiya Êzdiyên Efrînê ‎Silêman Cefer axivî û bang li PDK'ê kir ku dev ji destwerdana karûbarên Şengalê berde û got: "Ka ‎em bi hev re bînin bîra xwe ku kê Şengal ji çeteyên DAÎŞ’ê rizgar kir. Ma ne gerîla ji bo ‎parastina Şengalê qurbanî da? Em bînin bîra xwe ku hêzên PDK'ê çawa ji li hember ‎çeteyên DAÎŞ reviyan. Ji ber vê yekê divê PDK'ê dev ji hewldana ketina Şengalê berde. "‎

Cefer piştrast kir ku tenê keç û xortên Şengalê dikarin Şengalê biparêzin û bi rêve bibin û ‎wiha domand: “Welatiyên Şengalê kesên ku destwerdana şengalê bikin û desthilatdariya xwe ‎li ser wê vegerînin qebûl nakin, ji ber vê yekê dê Şengal ji bo şêniyên Şengalê be.”‎

Hevserokê Meclîsa bajarokê Til Rifet, Mihemed Henan bal kişand ser komploya navneteweyî ya li dijî Rêberê Gelê Kurd ‎Abdullah Ocalan û got: "Her tiştê ku li dijî gelê Kurd diqewime bi hev ve girêdayî ‎ye. Armanca komploya li dijî Rêber Abdullah Ocalan, heman armancên dijmin ên hewldana kontrolkirina ‎Şengalê ye. Ji ber ku hemû welatên dijber dixwazin axa Kurdistanê dagir bikin û gelê Kurd ‎tune bikin."‎

Henan di dawiya axaftina xwe de bang li gel kir ku li dijî hêzên dijmin serî hildin û got: "Divê ‎gelê me li dijî siyasetên dijmin ên ku hebûna me hedef digirin, serî hildin. Her wiha ji bo ku ‎em rê li hember hewldanên dijmin bigirin divê em bi hemû hêza xwe li ber xwe bidin."

 ‎Xwepêşandan bi diruşmeyên silavkirina berxwedana gelê Şengalê bi dawî bû.‎