Bi hezaran şêniyên Reqayê li qada Meclisa Giştî ya bajêr kom bûn û wêneyên 17 gerîlayên HPG'ê ku vê dawiyê di êrişên kîmyewî yên dewleta Tirk a dagirker de şehîd bûbûn, hildan.

Ji bo ku balê bikişînin ser şerê qirkinê yê bi çekên kîmyewî yê ku dewleta Tirk a dagirker li dijî gerîlayan dimeşîne, bi dehan xwepêşandêran cil û bergehên parastina ji çekên kîmyewî li xwe kirin.

Di xwepêşandanê de bênavber dirûşmeyên şermezarkirina dewleta Tirk a dagirker hatin berzkirin û xwepêşandêr ber bi Stada Beledî ve çûn ku salvegera 5’an a rizgarkirina bajarê Reqayê ji çeteyên DAIŞ’ê pîroz bikin.

Di pîrozbahiyê de bi hezaran şêniyên Reqa, şêx, rûspiyên eşîrên wê, şandeyên ji tevahî herêmên Bakur û Rojhilatê Sûriyeyê, şandeyeke ji Koalîsyona Navneteweyî û Meclisa Sûriya Demokratîk (MSD) beşdar bûn.

Pîrozbahî bi merasîmeke leşkerî ya ji hêla şervanên QSD’ê ve dest pê kir, dûre komîteya amadekar a pîrozbahiyê bixêrhatina beşdaran kir, spasiya şervanên QSD’ê kir.

Tê payîn li ser navê Meclisa Leşkerî ya Reqa, Meclisa Sivîl a Reqayê, Meclisa Rêveber a Bakur û Rojhilatê Sûriyeyê, Kombûna Jinan a Zenûbiya û Meclisa Malbatên Şehîdan axaftin werin kirin.