Li navçeya Amûdê ya Qamişlo forûma navneteweyî ya li ser DAÎŞ’ê di roja duyemîn de didome. Forûm ji aliyê Navenda Rojava ya Lêkolînên Stratejîk tê lidarxistin.

Di forûmê de ew ê îro li ser çar meseleyan were sekinandin.

Di rûniştina yekemîn de wê aliyên leşkerî û ewlehiyê yên terora DAÎŞ’ê were nirxandin. Li ser navê QSD’ê wê fermandareke YPJ’ê Tolhildan Raman, Dr. Nîcholas Heras, Dr. Seed Bîn Umer û rojnameger Zana wê biaxivin.

Rûniştina duyemîn wê li ser aliyê çand û baweriyê ya DAÎŞ’ê were sekinandin. Di vê rûniştinê de jî wê Mensûr Teyfûrî, Dr. Amy Aûstîn Homales, Thomas Garret û Mihemed Cîhad Îbrarî gotarên xwe pêşkêş bikin.

Di rûniştina sêyemîn de jî wê qala bandorên civakî û ekonomîk ên terora DAÎŞ’ê were kirin. Li vê derê wê Dr. Ehmed Yûsiv, Dr. Muhîb Salha û lêkolîner Ehmed Pelda pêşkêşiyên xwe bikin.

Rûniştina dawîn jî wê li ser aliyê jinê ya terora DAÎŞ’ê be. Wê Lîna Berekat moderatoriya forûmê bike û Bêrîvan Mihemed Yûnis û Zozan Sîma wê biaxivin.

Piştî pêşkêşiyên forûman wê bi pirs û bersivan nîqaş werin kirin.