Welatiyên bajarê Girê Spî li Çerxerêya Elem kom bûn, tevlî kawranê şervanên QSD′ê Bîlal Mihemed El-Mudehî û Mihemed Cûma Mihemed ên ku di pêngava rizgarkirina Reqayê de şehîd bûne, bûn û berê xwe dan Goristana Şehîd Mehmûd Tumê.

Girseya gel dirûşmeyên ″Şehîd namirin″ qîr kirin û alên QSD/YPG/YPJ/PYD′ê, Hêzên Asayîşê û Tirafîkê hildan.

Di merasîm de, Hevserokê Rêveberiya Xweser a bajarê Girê Spî Hemdan El-Ebid, Endamê Rêveberiya TEV-DEM′ê Selahedîn Firat, Fermandarên YPG/YPJ/QSD/HPC′ê û Hêzên Xweparastinê amade bûn.

Merasîm bi deqeyek rêzgirtina leşkerî ve destpê kir. Piştre li ser navê Saziya Malbatên Şehîdan, Meclîsa gundê Elî Baciliyê û TEV-DEM′ê, axaftin hatin kirin, di axaftinan de sersaxî ji malbatên têkoşeran re hat xwestin û bal hat kişandin ser rola şehîdan a di rizgarkirina herêmê ji terorê û belavkirina ruhê biratiya gelan de. Her wiha soza domandina têkoşînê û parastina destkeftiyên şoreşê hat dayîn.

Di dawiya merasîmê de, nasnameyên cangoriyan hatin xwendin, radestî malbatên wan hatin kirin.

Cenazeyên şehîdan bi dirûşiman ve hatin veşartin.