Bi sedan welatiyên herêma Dêrikê cenazeyê şervanê YPG’ê Xebat Dêrik (Salih Xidir Hemûş) ku di Pêngava Bagera Cizîrê de şehîd bûbû, ji nexweşxaneya bajarê Dêrikê wergirtin û bi karwanekî wesayîtan ber bi Goristana Şehîd Xebat ve bi rê ketin.

Li goristanê ji bo cangoriyên azadiyê deqîqeyekê rêz hate girtin û  şervanên YPG’ê merasîmeke leşkerî li dar xist. Hevserokê Meclîsa Damezirîner a Federaliya Demokratîk a Bakurê Sûriyeyê Mesnûr El-Selûm axivî û sersaxî ji malbata şehîd Xebat re xwest û got ku bi saya keda şervana serkeftinên mezin hatine bidestxistin. Mensûr El-Selûm got “Sala derbasbyî sala rizgarkirin û têkçûyîna DAÎŞ‘ê bû, wê sala nû bibe sala azadiya Rêber Abdullah Ocalan. Bi hevgirtina hemû pêkhateyan sîstema desthilatdar li herêmê şikest.”

Piştî axaftina nasnameya şehîd  hate  xwendin û radestî  malbata wî hate kirin.

Li ser navê malbata Şehîd Xebat, xalê wî Remedan Xelef axivî û diyar kir ku ew bi şehadeta xwarziyê xwe serbilind in û got ku bêşehadet azadî pêk nayê.

Piştî axaftinan, cenazeyê şehîd Xebat bi dirûşmeyên ‘Şehîd Namirin’ û tilîliyên dayîkan li goristanê hate veşartin.