Bi sedan welatiyên bajarê Serêkaniyê, Dirbesiyê û gundewarên wê cenazeyê Şervanê YPG’ê Azad Menecîr (Ezedîn Elî) yê ku 21’ê Kanûnê di Pêngava Bagera Cizîrê de şehîd bûbû, ji Nexweşxaneya Roj a bajarê Sêrkaniyê wergiritn û bi karwanekî wesayîtan ber bi Goristana Şehîd Rûstem Cûdî ve ketin rê.

Li goristanê ji bo şehîdên azadiyê deqîqeyek rêz hate girtin û ji aliyê şervanên YPG/YPJ’ê ve merasîmekî leşkerî hate lidarxistin. Endama Meclîsa Malbatên Şehîdan a bajarê Serêkaniyê Fehid Reşîd bi xêrhatina hemû kesî kir û sersaxî ji malbata tekoşer Azad Menecîr re xwest.

Li ser navê Fermandariya YPG’ê Agirî Jînda axivî û wiha got; “Her kes dizane ku bi xwîna şehîdan Şoreşa Rojava bi ser dikeve û biratiya gelan pêk hatiye. Şehîdan ji bo vê yekê bedelên giranbûha dane. Em soz didin çawa me Reqa ji terora DAIŞ‘ê rizgar kir em ê li herdeverê Sûriye wan têk bibin.”

Di merasîmê de her wiha bi navê malbata şehîd Azad Menecîr birayê wî Ehmed Elî got: ”Destên ku dirêjî Rojava bibe, ew destê wê were şikestin. Malate me du bira ji bo vê dozê dane û em amade ne ku tola şehîdên xwe rakin.”

Piştî axaftinan nasnameya şehîd hate xwendin û radestî malbata wî hate kirin. Girseya gel cenaze li ser milê xwe kirin û di nava dirûşmeyan û tilîliyên dayikan li goristanê veşartin.