Bi sedan welatiyên Amûdê cenazeyê YPG’ê Îbrahîm Hisên (Lorens) ku 24’ê Mijdarê di Pêngava Bagera Cizîrê de şehîd bûbû, ji navenda tenduristiyê wergirtin û bi karwanekî wesayîtan ber bi Goristana Şehîd Îsmaîl ve ketin rê.

Li goristanê ji bo bîranîna şehîdên têkoşîna azadiyê deqîqeyek rêz hate girtin û ji aliyê şervanên YPG/YPJ’ê ve merasîmeke leşkerî hate lidarxistin. Piştre Hevserokê Desteya Hundirin a herêma Cizîrê Kenan Berekat axivî û wiha got; “Rêgezê biratiya gelan ku Rêberê Gelê Kurd Abdullah Ocalan ji bo wê bang dike li Rojava diyar dibe, ciwanên herêmê ji bo azadiyê û jiyaneke bi rûmet berdêlên giranbûha didin."

Piştre nasnameya şehadetê ya şehîd hate xwendin û radestî malbatê hate kirin. Girseya gel cenazeyê şervanê YPG’ê Îbrahîm Hisên (Lorens) bi dirûşme û tilîliyan li goristanê veşartin.