Bi sedan welatiyên bajarê Qamişlo,ji bo veşartina  cenazeyê şervanê YPG'ê Sûleyman Abdûlbaqî (Şoreş Diyar) ku duh di Pêngava Xezaba Firate de jiyana xwe ji dest dabû, berê xwe dane Mala Gel a taxa Enteriyê. Hevalên wî yek bi yek wêneya li darbesta wî maç kirin û dayîkan jî tilîlî dan.

 Girseya gel piştî wergirtina cenaze bi dirûşmeyên 'Şehid Namirin', 'Ey şehîd xwîna te li erdê namîne' û 'Qamişlo zavayê  te hat'  ji taxa Entariye heta bi gorîstana Şehîd Delîl Sarûxan meşiyan. Di merasîmê de gelek saziyên sivîl û leşkerî amade bûn.

Li goristanê ji bo cangoriyên Kurdistanê deqeyek rêz hate girtin û merasîmeke leşkerî hate lidarxistin. Piştre li ser navê Saziya Malbatên Şehîdan  Fatma Tahir axivî, di şexsê şehîd Şoreş de hemû şehîdên şoreşê bi bîr anî û got: ″Em bejna xwe li hember cangoriyên azadiyê ditewînin. Pewîste ku em xwedî li xwîna şehîdan derkevin, bi rihekî seferber tev bigerin. Em ê li her cihî berxwedana xwe bidomînin. Ez sersaxiyê didime malbata şehîd û Rêber APO û şehîd namirin.″

Piştî axaftinan, nirxandina  şervanê YPG'ê Şiyar Diyar  a li ser şoreşa Rojava, hat guhdarkirin.

Piştre Bavê şervanê YPG'ê Şiyar Diyar, Ebdilbaqî Ehmed jî gelê ku beşdarî merasîmê bûbûn silav kir û wiha got: ‘’Di şexsê heval Şoreş de, em hemû şehîdên haqîqetê  bi bîr tînin û bejna xwe li ber wan ditewînin. Em ê heta dawiyê şopdarên doza  wî bin û tu carî çeka wî li erdê nehêlin. Di şexsê Serok  APO de em soz didin.″

Piştre nasnameya şervanê YPG'ê hat xwendin û radestî malbata wî hat kirin.Cenazeyê şervanê YPG'ê Şoreş Diyar bi tilîlî û dirûşmeyan li Goristana Şehîd Delîl Sarûxan hat veşartin.