Cenazeyê şervanê QSD’ê Mihemed Ebdo (Birûsk Kobanê) yê 22’ê Mijdara 2022’an di encama êrîşeke hewayî ya dewleta Tirk a dagirkerde şehîd bû, li Goristana Şehîd Dîcle ya Kobanê hat veşartin. Bi sedan şêniyên bajarê Kobanê û gundên derdora wê beşdarî merasîmê bûn.

Di merasîmê de hevseroka Desteya Hundirîn a Herêma Firatê Sozdar Şêxo axivî û got beşdariya bi sedan şêniyan di merasîma şehîdên azadiyê de nîşaneya ku gel peyamekê didin dijmin.

Piştre, endamê Meclîsa Giştî ya Partiya Yekitiya Demokratîk (PYD) Ehmed Xoce got: “Bilindkirina asta têkoşînê erkeke mezin li ser milên me ye. Em bawer in ku em dikarin serkeftinê bi dest bixin, îro bi hezaran ji vî gelî li hember dewleta Tirk a dagirker şehîd bûn.”

Di merasîmê de Meclîsa Malbatên Şehîdan nasnameyên 3 gerîlayên ku li çiyayên Kurdistanê di cih û demên cuda de şehîd bûbûn, eşkere kirin. Navên şehîdan wiha ne: Midêrka Besrawî (Avaşîn Zagros), Gardînya Şêxo (Destan Rustem Cûdî) û Ciwan Elî (Kendal Botan).