Welatiyên bajarê Qamişlo cenazeyê şervanê Hêzên Ewlehiya Navxweyî Dilşad Ebdo ku 13’ê Îlonê dema bi erka xwe radibû şehîd bûbû ji navenda Meclîsa Malbatên Şehîdan a taxa Enteriyê wergirtin û bi karwanekî wesayîtan ber bi Goristana Şehîd Delîl Saroxan ve ketin rê.

Li goristanê ji bo bîranîna şehîdên têkoşîna azadiyê deqîqeyek rêz hate girtin û ji aliyê şervanên Hêzên Ewlehiya NavxweyÎ ve merasîmeke leşkerî hate lidarxistin. Piştre Hevseroka Desteya Malbatên Şehîdan a Herêma Cizîrê Welîda Botî, Hevserokê Desteya Navxweyî ya Herêma Cizîrê Kenan Berekat axivîn.

Di axaftinan de sersaxî ji malbata şehîd û gelê Bakur-Rojhilatê Sûriyeyê re hate xwestin. Li aliyê din hate gotin ku ew ê destkeftiyên bi xwîna şehîdan hatine bidestixstin were parastin û piştgiriyê bidin hêzên ewlehiya navxweyî.

Piştre nasnameya şehadetê ya şehîd hate xwendin û radestî malbatê hate kirin. Girseya gel bi dirûşme û tilîliyan cenazeyê şervanê Hêzên Ewlehiya Navxweyî Dilşad Ebdo li goristanê veşartin.