Welatiyên navçeya Til Temir bi merasîmekê cenazeyê şervanê Hêzên Meclîsa Heres Xabûr a Aşûrî li goristana şehîdan a li gundê Til Şinan ê navçeya Til Temirê veşartin. Şervanê Heres Xabûr Bitrus Îşo li gundê Til Werdiyat ê navçeya Til Temir dema erka bi erka xwe radibû şehîd bûbû.

‘XAK Û RÛMETA XWE PARAST’

Merasîm li hola dêra El-Qedîsa bi deqîqeyek rêzgirtinê destpê kir. Hevseroka Partiya Yekîtiya Suryan Gabriyel Şamûn, bi sedan şêniyên navçeyê û gundewarên wê beşdarî merasîmê bûn. Keşe Otonyos El-Heno wiha axivî: "Pîroz be ji wî kesê ku xwe ji şehadetê re amade kiriye. Ji destpêka êrîşên çeteyên DAÎŞ`ê li ser gundê Til Werdiyat şehîd Bitrus kêliyekê jî ji dêrê dûr nema. Ji xak û rûmeta xwe hez dikir û ji ber wê jî di oxira wê de canê xwe feda kir."

Li aliyê din ji fermandarên Meclîsa Heres Xabûr Madlîn Xemîs axivî û hemû şehîdên ku ji bo parastina axa xwe canê xwe feda kirine, bibîr anîn. Endamê Meclîsa Malbatên Şehîdan Mihemed Baqî Kotî axivî û îşaret bi yekrêziya pêkhate û olan kir û wiha anî ziman: "Ev cihê serfiraziyê ye. Şehîdên me şehîdên azadî û rûmetê ne. Ji ber ku soz dan û gihîştin asta şehadetê."

Piştre nasnameya şehadetê ya şehîd hat xwendin û radestî malbatê hate kirin. Girseya gel bi merasîmeke leşkerî cenazeyê Meclîsa Leşkerî ya Heres Xabûr ya Asûrî Bitrus Îşo li goristanê veşartin.