Bi hezaran welatiyên Kantona Efrînê cenazeyê endama Hêzên Asayîşa Efrînê Sûheya Elîko ya ku di 28’ê Kanûnê de ji ber krîza dil jiyana xwe ji dest dayî, ji nexweşxaneya Efrînê wergirtin û bi karwanekî wesayîtan ber bi Goristana Şehîd Refîq ve ketin rê.

Darbesta Sûheyla bi alayên Hêzên Asayîşê, gul û kulîlkan hatibû xemilandin. Li goristanê ji bo cangoriyên azadiyê deqîqeyekê rêz hate girtin. Piştre Cîgîra Seroka Desteya Hindirîn a Kantona Efrînê Salîha Seydo, Rêveberê Meclîsa Malbatên Şehîdan a Kantona Efrînê Xelîl Îbrahîm Îsa û li ser navê malbata şehîd Sûheyla, bîrayê wê Arîf Elîko axivîn.

Axaftvanan  sersaxî ji malbata şehîd re xwestin û rola wê ya di serxistina Şoreşa Rojava û parastina destkeftiyên de destnîşan kirin.

Di axaftinan de hate gotin ku wê gefên Tirkiyeyê yên ji bo têkbirina vîna gelan û projeya federaliya demokratîk li hember berxwedana gel, bi ser nekeve.

Piştî axaftinan, nasnameya şehîd hate xwendin û radestî malbata wê hate kirin. Cenazeyê endama Hêzên Asayîşa Efrînê Sûheyla bi dirûşmeyên ‘Şehîd Namirin’ û tilîliyên dayîkan li goristanê hate veşartin.