Bi sedan şêniyên Kantona Efrînê cenazeyê şervanê YPG`ê Arcan Atkîn (Cayan Batman)ê ku 16’ê Tebaxê di bersivdayîna êrîşên artêşa Tirk a dagirker a li ser gundên Efrînê de şehîd bibû, li Goristana Şehîd Seydo ya Kantona Efrînê, spartin axê.
Bi sedan şêniyên Kantona Efrînê, şervanên YPG, YPJ, nûnerên Desteya Parastinê, Tevgera Civaka Demokratîk, Kongreya Star û Meclîsa Malbatên Şehîdan, cenazeyê Acar Atkîn (Cayan Batman) ji Nexweşxaneya Avrîn wergirtin û bi karwaneke wesayîtan ber bi Goristana Şehîd Seydo ya herêma Cindirêsê ve ketin rê.
Li goristanê merasîm bi deqeyek rêzgirtina leşkerî ya şervanên YPG/YPJ’ê ve destpê kir. Piştre, ji Fermandarên YPG`ê Ferzendh Efrîn, Endamê Komîteya Piştgiriya bi Malbatên Şehîdan Şervan Hesen û dayika şehîd Canxort, Asya Ebdo, axivin. Axaftvanan sersaxî ji malbata şehîd re xwestin û soza şopandina rêya şehîdan da. Her wiha axaftvanan, anî ziman ku gelên Efrîn û Şehbayê li dijî êrîşên artêşa Tirk a dagirker û çeteyên wê, destanên dîrokî dinivisînin.
Dayika şehîd Canxort, tekez kir ku şehîd Cayan wekî kurê wê ye, ji ber ku malbata wî di merasîma oxirkirina wî de ne amade ye û ew niha bû dayika du şehîdan.
Piştî axaftin bi dawî bûn, mamosteya zimanê Kurdî Fatime Hisên nasnameya şehîd Cayan Batman xwend û radestî dayika Şehîd Canxort kir.
Di dawiya merasîmê de, bi dûrişmeyên dilsoziya bi şehîdan re, cenazeyê Cayan Batman hate spartina axê.
