Li Helebê bi sedan kesan cenazyê şervanê YPG’ê Gelhat Efrîn (Orhan Şêxo) yê di 23’yê Mijdarê de li Til Temîrê şehîd bû, bi merasîmekê veşart. Xelk, ji ber Nexweşxaneya Yasîn a li rojavayê taxa Şêxmeqsûd tevî tilîliyên dayikan ber bi goristanê ve bi rê ket. Di merasîma veşartinê de yek ji fermandarên YPG′ê Şervan Efrîn axivî û got: "Ev roja pîroz, roja damezirandina PKK′ê, şervan Gelhat şehîd bû.“

Şervan Efrîn diyar kir ku şoreşa Rojava li dijî tevahî planên dewleta Tirk a dagirker e û got: “Şehîd Gelhat ji destpêkê tev li vê şoreşê bû û tev li pêngavên ji Efrîn heta bi Şêxmeqsûdê bû û li Til Temîrê şehîd bû. Di ber parastina welat de em şehîdan didin û ji dijmin natirsin. Em ji bilî welatekê azad û demokratîk û jiyaneke birûmet qebûl nakin. Divê her kes li dijî êrîşên dagirkeriyê rabe li ser piyan."

Hevseroka Meclîsa Malbatên Şehîdan Rewşen Mihemed, têkoşîna şehîd Gelhat pîroz kir û got: "Em bi êrîşan lawaz nabin lê israr û hêza me ya pêkanîna azadiyê pê zêde dibe. Dem, dema tolhildanê ye."

Dayika şehîd Zeyneb Hec Muslim jî wiha got: "Kurê min di ber welat de canê xwe da. Ew şehîdê çar parçeyên Kurdistanê ye. Wî, ji bo rizgarkirina Efrîn û herêmên dagirkirî sond xwar. Min piştgitiyê ji bo têkoşîna wî di hemû pêngavên rizgarkirinê de da."

Zeyneb bi domdarî wiha got: "Şehadet rûmet e. Em îro rûbirûyê şerekî ne û me bi hezaran şehîd dane û em dev ji vê rêyê bernadin. Em malbatên şehîdan divê li fedekariyên şehîdên xwe bibin xwedî û bidin ser şopa wan.“

Dûre, endama Komîteya Perwerdehî û Hînkirinê ya Civaka Demokratîk Zîlan Şêxo wesîqeya şehîd xwend û radestê malbatê kir.