Bi sedan welatiyên bajaroka Sirînê ya dikeve başûrê Kantona Kobanê cenazeyên şervanê QSD′ê Seyid Ehmed Mustefa (Ebû Teleqa) û Endamê HPC′ê Muhîb Hemaşî (Muhîb Cirniye) ên ku di pêngava rizgarkirina Reqayê de şehîd bibûn, li Goristanên bajarokên Cirniye û Sirînê veşartin.

Merasîma oxirkirinê li pêşiya Saziya Malbatên Şehîdan a bajaroka Sirînê bi beşdariya şervanên YPG/YPJ/HPC′ê û Hevserokatiya Meclîsa TEV-DEM′ê Hedle Hesen û Ehmed Şêxo, hat lidarxistin. Merasîm li gel deqeyek rêzgirtina leşkerî ve destpê kir.

Piştre li ser navê Saziya Malbatên Şehîdan Mûstefa Mislim û Hevserok Meclîsa TEV-DEM′ê ya Kantona Kobanê Ehmed Şêxo axivîn, sersaxî ji malbata şehîd re xwestin û serkeftinên ku li Reqayê bi saya hevgirtina gelê Bakurê Sûriyê û fedekariyên ciwanên herêmê têne bidestxistin, pîroz kirin. Her wiha bang li gelê herêmê kirin ku piştgiriya hêzên QSD′ê bikin û hêviyên şehîdan pêk bînin.

 Birayê şehîd Seyid Ehmed, Receb Mûstefa jî axivî û got ku ew bi şehadeta birayê xwe serbilind in û soza şopandina rêya cangoriyên azadiyê da.

Piştre nasnameyên şervanan hatin xwendin, radestî malbatên wan hatin kirin.

Di dawiya merasîmê de cenazeyê şehîd Seyid Ehmed li Goristana bajaroka Sirînê û cenazeyê şehîd Muhîb Hemaşî li Goristana bajaroka Cirniye, hatin veşartin.