Fermandariya Giştî ya Hêzên Ewlehiya Navxwe ya Bakurê Sûriyê ragihand, di şerê Qamişlo de ya bi dijî hêzên rejîmê 11 leşkerên rejîmê hatine kuştin. Di daxuyaniyê de hate gotin, ‘’Di şer de 7 endamên me şehîd bûne û endamekî me birîndar bûye.’’
Fermandariya Giştî ya Asayişê di daxuyaniya nivîskî de got, ‘’Dewriyeyeke ji sê wesayitan a hêzên rejîma Sûriyê li Qamişlo ketiye qada ku hêzên me lê ne û hin sivîl desteser kirine.’’
Her wiha hate gotin, ‘’Leşkerên dewriyeya rejîmê dema ku ji niqteyên me derbas bûn bi çekên sivil û navîncî li hêzên me reşandine’’ û domarî hate diyarkirin ku hêzên asayişe jî bersiv dane êrîşê.
Fermandariyê got, ‘’11 endamên rejîmê hatine kuştin, 2 jê birîndar bûne. Di şer de 7 endamên me şehîd bûne û endamekî me birîndar bûye.’’
Di daxuyaniyê de bi domdarî hate gotin, ‘’Em Hêzên Ewlehiya Navxwe ya Bakurê Sûriyê soz didin şehîd û gelê xwe ku destkeftiyên şoreşê û gelê xwe biparêzin. Ji kûderê were bila were, li dijî hemû kesên ku destkeftiyên gelê me dikin hedef, tevlîheviyê dikin, aramiyê xira dikin, em ê li ber xwe bidin.’’
