Vê carê jî şêniyên Boztep yê li rojhilatê bajarê Kobanê, ji bo piştgiriya şervanên li eniya pêş xwarinê çêkirin. Şêniyên gelê Elî Şarê têkildarî mijarê ji ajansa ANF'ê re nêrînên xwe anîn ziman.

Naylê Hemo anî ziman ku ji bo piştgiriya şervanên xwe bikin ew xwarinê ji wan re çêdikin û wiha got: "Em wek dayîkên şervanên ji bo piştgiriya zarokên xwe û şervanên xwe bikin, em xwarinê ji wan re çêdikin. Şervanên me di çeperên şer de berxwedaneke bê hempa li hember êrişên dewleta Tirk a dagirker didin meşadin."

'EM Ê HETA NEFESA DAWIYÊ LI PIŞTA ŞERVANÊN XWE BIN'

Naylê Hemo diyar kir ku heta nefesa xwe ya dawiyê ew ê li pişta şervanên xwe bin û wiha pê de çû: “Dewleta Tirk bi hemû êrişên xwe yên hovane li ser herêma me didin meşadin. Dagirkeriya dewleta Tirk a dagirker her çiqasî êrişan pêk tîne, lê tu carî me nikare tune bike, ji ber ku em xwedî hêza herî xurt in. Şervanên me li hember êrişên dagirkeriyê berxwedaneke dîrokî didin meşadin, em ê heta nefesa xwe ya dawiyê li pişta şervanên xwe bin û wan tu carî bi tenê nahêlin.”

Dayîka bi navê Îslim jî ragihand ku şervanên wan hêza wan e û got: “Em wek dayîk ji bo ku em li piştgiriya şervanên xwe bikin çi ji me were xwestin, em ê bikin. Şervanên me hêza me ne, em ê heta dawiyê li kêleka şervanên xwe bin. Em xwarinê ji şervanên xwe re çêdikine ji bo ku em piştgiriya zarokê xwe bikin.”

`ŞERVANÊN ME HÊZ Û RÛMETA ME NE`

Îslim got, vaye şervanên wan li eniya pêş li ber xwe didin ji bo ku axa xwe û welatê xwe ji êrişên dagirkeriya Tirkiyeyê biparêzin û wiha pê de çû: “Şervanên me hêza û rûmeta me ne, em ê jî heta dilopek xwîn di canê me de hebê, li pişta wan bin û êrişên dagirkeriya Tirkiyê û çeteyên wê têk bibin. Şervanên me ji bo parastina axa û gelê xwe li hember êrişên dewleta Tirk a dagirker di çeperên şer de li ber xwe didin.”