Şêniyên navçeya Tirbespiyê ya kantona Qamişlo bi boneya 18'emîn salvegera Serhildana Qamişloyê li bajarokên Til Marûf û Helwê serdana gorên 2 şehîdan kirin.

Şêniyên Til Marûf û endamên Meclîsa Malbatên Şehîdan li dor gora şehîd Ziyad Îbrahîm Yûsif kom bûn, piştre endamê Meclîsa Malbatên Şehîdan a bajarê Tirbespiyê Hecî Ebdî Xelef şehîdên Serhildana Qamişloyê û hemû şehîdên azadiyê bi bîr anîn.

‘SERHILDAN BERDEWAM DIKE‘

Xelef anî ziman ku çirûska serhildanê li Bakur û Rojhilatê Sûriyê hê jî berdewam e û got: “Hikûmeta Şamê bersiva daxwazên gelê Kurd nedaye û heta niha jî siyaseta xwe ya tunekirinê didomîne.“

Piştre şêniyan serdana gora şehîd Mihemed Emîn Seyêd a li bajarokê Helwê kir û pismamê şehîd Hesen Mihemed destnîşan kir ku Serhildana Qamişlo û xwîna şehîdên vala neçû û encamê wê jî şoreşa Bakur û Rojhilatê Sûriyê ye.   

GIRKÊ LEGÊ

Bi sedan şêniyên navçeyên Girkê Legê, Çilaxa û Til Koçer li bajarokê Abirê yê navçeya Çilaxa, şehîd Ehmed Merî yê di Serhildana 12`ê Adarê de şehîd bûbû, bîranîn.

Şehîd Ehmed Merî li ser gora xwe hate bîranîn û piştre endamê rêveber ê Meclîsa Malbatên Şehîdan li Çilaxa Hisên Îsa axivî û şehîdên Serhildana Qamişloyê bîranîn.

Îsa diyar kir ku pêkhateyên Bakur û Rojhilatê Sûriyê hemû planên hikûmeta Şamê yên bi armanca derxistina fitneyan bi saya felsefeya neteweya demokratik têk birin.

DÊRIK

Bi heman wesîleyê bi hezaran şêniyên bajarê Dêrikê û herêmên Koçeratan û Beravê, her wiha şandeyên partiyên siyasî, oldar û nûnerên saziyên civaka sivîl li Qada Azadî ya Dêrikê kom bûn.

Şêniyan şehîd Welîd Şahîn û Hisên Hesen li ser gorên wan bîranîn. Şêniyan qurnefîl danîn li ser gora şehîdan.

TIL BERAK

Meclîsa Navçeya Til Berak têkildarî Serhildana 12`ê Adarê li qada meclîsê, daxuyaniyek da. Endamê rêveber ê Meclîsê Wenas Ebdullah daxuyanî xwend.

Ebdullah anî ziman ku rughê berxwedana 12`ê Adarê bingeha Şoreşa 19`ê Tîrmehê ye û got:“ Li dijî terorê û dagirkeriyê hemû pêkhateyên Rojava û Bakur û Rojhilatê Sûriyê yekitiya xwe ava kirin û bi armanca avakirina Sûriyeke demokratîk, Rêveberiya Xweser a Demorkatîk ava kirin. Em Rêveberiya Demokratîk şehîdên 12`ê Adarê û hemû şehîdên azadiyê bi bîr tînin. Li aliyekî din jî sersaxiyê ji malbatên şehîdan re dixwazin û soza berdewamkirina têkoşînê heta mîsogerkirina armancên şehîdan didin."