Serketina Efrînê bi çîrokên Berxwedêrên Serdemê ve girêdayî ye. Yek ji van jî çîroka Xebat Kobanê ye. Ji ber ku xwişka wî li Efrînê ye destûr nedane wî ku tevlî berxwedana Efrînê bibe. Xebat ji me re behs dike bê çawa fîrar kiriye û tevlî berxwedanê bûye.
Meheke êrîşên dagirker ên dewleta Tirk û çeteyên wê yên li hember Efrînê qediya. Duyemîn artêşa mezin a NATO'yê, deh hezaran çeteyên pê ve girêdayî û teknolojiya şer a herî dawî li Efrînê çawa tar û mar bû? Çîroka beşdarên berxwedanê bersiva vê ne. Çîrokên Berxwedêrên Serdemê yên di eniyên şer de, vîna azadiyê çawa her şêweyê sîlehên şer bêbandor dike? Em ê van bi we re parve bikin.
ENIYA FÎRARAN: CINDIRÊSÊ
Piştî êrîşên dewleta Tirk bi çar rojan ji hewayê û bejayî herî zêde êrîş li hember navçeya Efrînê Cindirêsê pêk hatin. Em li wir bi komeke şervanên YPG/YPJ'ê re diaxivin û em Xebat Kobanê li wir nas dikin. Piştî ku me kêmekî sohbet kir, em hîn dibin ku çawa êrîşên li hember Efrînê dest pê dikin Xebat ji Kobanê fîrar dike û tê Efrînê. Li gorî agahiyên me li wir bi dest xist Cindirêsê "eniya kesên fîrar kirine".
JI BERXWEDANA KOBANÊ BER BI BERXWEDANA EFRÎNÊ
Pêşî Xebat israr dike û dibêje "Di vê berxwedanê de hevalên hê bêhtir ked dane hene, bila ew biaxivin". Lê her çiqas zehmet bê jî em wî qanex dikin û di mewziya xwe de dipeyive. Xebat ji Kobanê ye. Di berxwedana Kobanê de cih girtiye û carekê li wir birîndar bûye. Piştî ku Kobanê bi ser ket, wî meşa xwe ya azadiyê dewam kiriye û bi dorê tevlî pengavên Girê Spî, Minbic, Tebqa û Reqayê bûye. Bi giştî sê caran birîndar bûye. Niha jî di berxwedana Efrînê de cih digre.
RÊWÎTIYA 2 SAETAN
Lê belê bi hêsanî nikarîbû tevlî berxwedana Efrînê bibe. Li gorî gotinên Xebat, fermandarên wî yên li Kobanê nehiştine ku bê Efrînê. Ji ber ku xwişka wî dihate Efrînê û ji heman malbatê divê du kes nebin. Xebat Kobanê diyar dike ku ew vê qebûl nake û dibêje: "Min israr kir, lê nebû. Piştre min jî rêyek dît. Min xwe di baxaja wesaîtekê de veşart û piştî du seat û nîvan hatim Efrînê."
LI EFRÎNÊ PARASTINA KURDISTANÊ HEYE
Xebat li eniya Cindirêsê ye û xwişka wî jî li eniyeke ku şer lê dijwar e, li Raco ye. Xebat derbarê vê de wiha dipeyive: "Xwişka min li wir bi hevrêyên xwe yên YPJ'ê li ber xwe dide, ji bo dagirker derbas nebin." Piştre jî bi van gotinan behsa girîngiya vê berxwedanê dike: "Gelê Kurd divê zanibe ku ev şer şerê man û nemanê ye. Li Efrîne ne tenê parastina Efrînê tê kirin, parastina tevahiya Kurdistanê tê kirin. Çar parçeyê Kurdistanê tê parastin."
