Ji bo şervanê HPG’ê şehîd Baran Çiya (Alan Alî) ku di 25’ê Gulanê de li Zapê şehîd bûbû, îro ji aliyê Meclisa Malbatên Şehîdan a Kobanê ve merasîma xiyabî li gundê Mewjikê yê Kobanê hat lidarxistin.

Girseya gel bi dirûşman berê xwe da konê sersaxiyê. Di merasîmê de endamê Meclisa Leşkerî a Kobanê Îsmaîl Îsmaîl axivî û got: “Baran fikir û felsefeya Rêber Apo ji xwe re esas girt û vê jî ew gihand serkeftinê. Îro jî hevalên Baran li çiyayên azad berxwedaneke bêhempa dikin.”

Piştî axaftinê belgenameya şehîd hat xwendin û radestî malbatê hat kirin.

LI ÇILAXAYÊ JI BO 52 ŞEHÎDAN MERASÎMA BÎRANÎNÊ

Meclisa Malbatên Şehîdan a kantona Cizîrê îro ji bo 52 şehîdên Hêzên Parastina Gel (HPG), YJA Star, Hêzên Sûriyeya Demokratîk (QSD), Yekîneyên Parastina Gel (YPG), Yekîneyên Parastina Jin (YPJ), Hêzên Ewlekariya Hundirîn û Hêzên Erka Xweparastinê yên ku di mehên Mijdar, Kanûn, Çile, Sibat, Adar, Nîsan û Gulanê û cihên cuda de şehîd bûne, merasîma bîranînê li dar xist. Merasîm li salona Navenda Çand û Hunerê ya bajêr hat lidarxistin.

Malbatên şehîdan, şêniyên Çilaxayê, endamên saziyên sivîl û xizmetguzarî yên bajêr û nûnerên hêzên leşkerî û partiyên siyasî di merasîmê de amade bûn.

Piştre endamê Meclisa Malbatên Şehîdan a Kantona Cizîrê Ziwar Elî axivî û got: "Em îro bi rêzdarî cangoriyên xwe yên ku bi xwîna xwe destana parastina xak û rûmeta me nivîsandin bi bîr tînin. Di şexsê wan de, em hemû şehîdên azadiyê yên ku bersiv dane banga welatê xwe û heta nefesa dawîn parastina welat kirin, bi bîr tînin."

Her wiha got: "Bi saya fedakariya wan em îro di nav ewlehî û aramiyê de dijîn. Em xwîna wan a pak a ku axa welatê me av da ji bîr nakin û em ê dilsozê têkoşîna wan bin. Ji ber ku em şagirtên felsefeya Rêber Abdullah Ocalan in û li ser şopa van şehîdan dimeşin, divê em yekitiya xwe biparêzin û li dijî hemû komployên dijmin têkoşîn û berxwedana xwe mezintir bikin. "

Merasîm bi xwendina nasnameyên 52 şehîdan û dirûşmên “Bê Serok jiyan nabe” û “Şehîd namirin” bi dawî bû.