Hêzên Sûriyeya Demokratîk (QSD) 25 jin û zarokên Êzidî ku ji çeteyên DAÎŞ’ê rizgar kiribûn ji bo gihandina Meclîsa Demokratîk a Şengalê radestî Mala Êzidiyan a li Amûdê kir.

Nûnerên Meclîsa Malbatên Şehîdan a navçeya Amûdê, fermandarên QSD`ê, endam û rêveberên Mala Êzidiyan û gelek dezgehên çapemeniyê li Bakur û Rojhilatê Sûriyê beşdarî civîna çapemeniyê bûn.

Rêveberê Mala Êzidiyan a Herêma Cizîrê Ziyad Hamid spasiya QSD`ê kir û diyar kir ku heta niha zêdetirî hezar jin û zarok hatine rizgarkirin.

Hamid wiha jî got; “Li gorî daneyên fermî hê 3 hezar û 40 Êzidî winda ne.”

25 Êzidiyên hatine rizgarkirin şandin deriyê sînor ê Sêmalka. Li deriyê sînor endamên Meclîsa Şengalê 25 Êzidî pêşwazî kirin û ber bi Şengalê ve ketin rê.