Parlamentera BDP’ê ya Êlihê Ayla Akat Ata, qedexekirina kurdî ya di kampên havînê ya li Wanê hatiye avakirin ji hikûmetê pirsî.

Ayla Akat, bi armanca ku wezîrê Werzîş û Ciwanan Suat Kiliç bersivê bide pêşnûmeyek pêşkêşî Meclisê kir. Di pêşnûmeyê de hate diyar kirin ku bila wezareta werzîş û ciwanan îdiayên der barê ku di kampên havînê yên li navçeya Westana Wanê hatiye avakirin de kurdî hatiye qedexekirin bibersivîne.

Di pêşnûmeyê de wiha hat gotin: “Tê îdia kirin ku di xebata Kampa Havînê ya ku wezaretê organîzekiriye de Sedat Dîlekçî ji bo ciwanên kurdî axivîne astengiyên cuda derxistine. Kesên bi navê Y.E û M.K ku li kampê dimînin diyar dikin ku Sedat Dîleçî axafatina kurdî û stranên kurdî qedexe kiriye. Dîlekçî ji bo vê pêkanînê hincetên wekê ‘Wezaretê ji me re di vê mijarê de nivîs şandiye’ aniye ziman.

M.K û Y.E der barê mijarê de serî li Midûriyeta Navenda Werzîş û Xizmetên Ciwanan a Wanê daye, lê der barê Dîlekçî de tu kar û bar nehatiye kirin. Li gorî îdiyan di 21’ê tîmrehê de di vegera kampê de di otobusê de di navbera ciwanên bi kurdî axivîne û Dîlekçî de nîqaş derketiye.

Akat di pêşnûmeyê de da zanîn ku  di vê mijarê de der barê kampê de wezaretê talîmatek bi vî rengî daye an na û der barê Dîlekçî de lêpirsînek hatiye destpêkirin an na.