Parlamentera Êlihê ya HDP'ê Feleknaz Uca ji bo Cejna Êzîdiyan li Meclîsa Tirk daxuyaniya çapemeniyê da.

Uca got,''Ez Cejna Êzî li gelê Êzîdî ku li tevahiya dîrokê hatine koçberkirin û qirkirin  pîroz dikim û hêvî dikim ku rojiya wan qebûl bibe''. Uca got Êzîdî her Kanûnê 3 heftiyan 9 rojan rojî digirin û piştre Cejna Êzî pîroz dikin.

Uca bi bîr xist ji ber ziman, çand, nasnameya Kurdî û baweriya Êzîdiyê 73 caran fermana Êzîdiyan hatiye rakirin û bal kişande fermana dawî ya li ser Êzîdiyan ku 3'ê Tebaxa 2014'an DAÎŞ'ê êrîş bi ser Şengalê de biribû, 3 hezar jin û zarok revandibûn û hê jî aqûbeta wan ne diyar e.

Uca got jinên Êzîdî yên ku DAÎŞ'ê revandin 2016'an bi rêya bûroyên li Dîlokê di ser bazarên dijîtal ên koleyan de hatin firotin û got, ''Li gel delîlan jî, bersûcên ku ji gelek dosyayan dihatin darizandin bi bayê bezê hatin berdan.''

Uca got li gel fermanê jî Êzîdî li Şengalê mane û got, çeteyên barbar ên DAÎŞ'ê ku li bajarên Kurdan hatin bicihkirin sûcê dijî mirovahiyê dikin, li Rojava Kurdên misilman û Êzîdî û hemû gelên din têkoşîna dijî qirkirinê didin.

Uca got li Bakurê Kurdistanê jî milkên Êzîdiyan hatine desteserkirin û dema ku dixwazin xaka xwe bistînin êrîşê bi ser wan de dibin.