Ber bi hilbijartina 24’ê Hezîranê ve, bi geşbûna HDP’ê re zext û zordariya li ser HDP’ê zêdetir dibe. Bi vê çarçoweyê li Xarpêt, Mêrdîn, Edene, Riha û Entalyayê operasyonên qirkirina siyasî hatin kirin û gelek kes hatin destgîrkirin.

XARPÊT

Li Xarpêtê, li navçeya Kovancilar û Aricakê polîsên Tirk bi ser gelek malan de girtin. Hevserokê Navçeya Kovancilarê Resûl Eker û yê Aricakê Azîz Bayrak jî di nav de 20 kes hatin destgîrkirin.

Diyar bû ku hin ji kesên ku hatine destgîrkirin li Fermandariya Jandarma ya Xarpêtê û hin jê li Edliyeya Paluyê têne girtin.

MÊRDÎN

Li Nisêbînê ya Mêrdînê Cemal Nergiz ê 55 salî ku li taxa Silhedîn Eyûbî dima ji hêla polîsan ve hate destgîrkirin

Malbata Nergiz got di pevgihîna gel de, di dema axaftinan de çima gotiye,’’Bijî HDP’’ û nîşana serkeftinê kiriye Nergiz hatiye destgîrkirin.

EDENE

Li navçeya Seyhan, Ceyhan, Yuregîr û Çukurovayê vê sibehê polîsan bi ser gelek malan de girtin û derî hatin şikandin.

Bi hinceta parvekirinên li ser medyaya civakî 15 kes hatin destgîrkirin.

RIHA

Li navçeya Xelîla ya Rihayê jî berê sibeha polîsan bi ser malan de girtin û Vedat Gokler, Mustafa Yilmaz Çîçek destgîr kirin. Gok û Çîçek li Şûbeya TEM’ê ya Rihayê têne girtin.

ENTALYA

Li Entalyayê jî duh berêvarkî polîsan bi ser malên xwedenkarên zanîngeha Akdenîzê de girtin û Farûk Ceylan, Mazlûm Efe, Ebûbekîr Ergun, Habat Karayilan û Sedat Alkan destgîr kirin.