Şervanên azadiyê yên Kurdistanê yên di meha Cotmehê de jiyana xwe ji dest dane, li bajarê Elmanya Kolnê bi merasîmekê hatin bîranîn.

Merasîma li Komeleya Mala Kurdan a li Kolnê ji aliyê TJKE ve hat organîzekirin. Di merasîmê de di kesayetiya Gulnaz Karataş (Bêrîtan), Gurbetelî Ersoz (Zeynep) û Aylîn Hêlîn Işik (Têkoşîn Koçgirî) de hemû cangoriyên têkoşîna azadiyê yên di meha Cotmehê de jiyana xwe ji dest dan, hatin bîranîn.

Li ser navê Malbatên Mexdûr û Windahiyan (KOMAW) Salih Cizîrê di axaftina xwe ya li merasîmê de bal kişand ser girîngiya cangoriyan ji bo azadiya Kurdistanê û got, "Şehîdên me paşeroja me, roja me ya îro û siberoja me ne. Em wan bi vî rengî dibînin."

Salih Cizîrî di axaftina xwe de rewşa Kobanê jî nirxand û destnîşan kir ku divê têkoşîna li dijî çeteyên DAIŞ'ê tê dayîn, li her deverê belav bibe. Li dû axaftinan, gerîlayên jiyana xwe ji dest dane bi sînevîzyonekê hatin vegotin.