Bi pêşengiya Navenda Civaka Kurd a Demokratîk a Lozanê, li bajarê Lozanê çalakiya piştgiriya bi Şirnexê hate lidarxistin. Parlementerê HDP’ê yê Şirnexê Faysal Sariyildiz û Hevseroka KCDK-E’yê Fatoş Goksungur jî di nav de gelek Kurdistanî û dostên wan tevlî çalakiyê bûn.

SARIYILDIZ: BERXWEDANA CIWANÊN KURD RÊ LI BER HILWEŞANDINA ERDOGAN VEKIR

Sariyildiz di çalakiyê de axivî û diyar kir ku bi geşbûna têkoşîna ciwanên Kurd, rejîma Erdogan dest bi hilweşandinê kiriye û got “Erdogan êdî hatiye asteke wisa ku, li hemberî cîhanê rezîl dibe. Têkoşîna li Rojava kir ku Erdogan di siyaseta cîhanê de were asta rezîlbûnê.”

Sariyildiz axaftina xwe wisa domand, “Bila her kes bizanibe ku ew xaniyên me li ser serê me birûxînin jî, ew ê nikaribin pêşiya berxwedana li Kurdistanê bigirin. Berdêla wê çi dibe bila bibe, em ê bi ser bikevin.”

GOKSUNGUR: DIVÊ EM BIBIN PARÇEYEKÎ TÊKOŞÎNÊ

Piştî Sariyildiz Hevseroka KCDK-E’yê Fatoş Goksungur got, “Hevgirtina gelê me yê Ewrûpayê ya bi bajarên hatine hilweşandin re girîng e, lê divê em ji giyanê hevgirtinê derkevin û bibin parçeyekî têkoşînê.”