Çalakiyên protestoyî yên li dijî desteserkirina şaredariyên Bajarê Mezin ê Mêrdînê, Êlih û Xelfetiyê dewam dikin. Di vê çarçoveyê de li navçeya Dêrik ê Mêrdînê meşa bi meşaleyî hate lidarxistin. Girseya ku li ser banga DEM Partiyê li ser rêya Dêrik-Qoser li hev civiyan, bi pêxistina meşaleyan û dirûşmeyan dest bi meşê kirin. Parlamentera DEM Partiyê Salîha Aydenîz û Hevşaredara Bajarê Mezin ê Mêrdînê Devrîm Demîr tevlî meşê bûn. Di meşê de dirûşmeyên, “Bijî Serok Apo”, “Dîsa dîsa serhildan Serokê me Ocalan”, “Jin, Jiyan, Azadî” û “Ji qeyûmê re na, rêz ji îradeyê re” hatin berzkirin û stran hatin gotin.

Meşa heta Qada Dêrikê dewam kir. Piştre ewil Hevşaredadr Devrîm demîr xîtabê gel kir. Devrîm Demîr diyar kirk u bi salan in tê xwestin berxwedana gel bitepisînin û gelê Kurd rûbirûyê êrîşên cuda têne hiştin. Demîr anî ziman ku 8 sal in bi qeyûman re polîtîkayeke taybet tê meşandin. Demîr bi lêv kir ku bi salan in gund û malên Kurdan têne şewitandin, lê ruxmê vê jî Kurd bi berxwedana xwe hatine asta xwerêvebirinê û wiha berdewam kir: “Em îradeya gelê xwe ne. Gelê me li pişt me ye, em li gel gelê xwe ne. Em polîtîkaya ku me înkar dike nas nakin. Em ê teqez nas jî nekin.”

‘GELÊ KURD DERS DIDE DESTHILATDARIYÊ’

Piştre Parlamentera DEM Partiyê Salîha Aydenîz mafê axaftinê girt û anî ziman ku ew ê her tim li pişt îradeya xwe bin û wiha dirêjî da axaftina xwe: “Ne 3 car hûn 300 car jî qeyûmê tayîn bikin, gelê Kurd wê kesên bi hilbijartinê diyar nebûnê nas nekin. Ji ber vê yekê dest ji vê polîtîkaya xwe berdin. We berê jî qeyûm tayîn kir. Gelê Kurd di sindoqan de bersiv da. Ji 2019’an ve gelê Kurd her carê dersa we da, we dîsa jî dersa xwe negirt. Îro di sala 2024’an de hûn dixwazin polîtîkaya xwe ya dijminatiyê bidomînin. Em dizanin; hûn teng bûne, hûn bêçare ne, em dizanin ku hûn dixwazin desthilatdariya xwe bidomînin. Ev tengaviya ve Dewleta Komarê xistiye xeteriyê. Ev rê ne rê ye, ev rêya tasfiye yê ye, jiyana bi hev re tasfiye dike. Ev rê azadiyê ji holê radike. Em dizanin; hûn dixwazin bi nenaskirina îradeya gelê Kurd re darbeyê bikin. Tirkiye bi darbeyan re tê rêvebirin. Lewma êdî hûn bi xilasbûnê re rû bi rû ne. Îro hûn dixwazin li Rojhilata Navîn bibin xwedî rol. Lê divê hûn bizanibin ku girtina wê rolê ji çareseriya demokratîk a pirsgirêka Kurd derbas dibe. Eger hûn dixwazin li Rojhilata Navîn bibin xwediyê ciheke; hûn neçar in pirsgirêka Kurd bi rengekî demokratîk çareser bikin. Rêya vê jî Rêberê Gelê Kurd e. Rêberê Gelê Kurd Abdullah Ocalan muxatabê vê ye. Em vê bi awayekî eşkere dibêjin.”

Salîha Aydenîz diyar kir ku desthilatdarî ji aliyekî ve dibêje wê pirsgirêka Kurd bi rêbazên aştiyane çareser bikin, li aliyê din jî qeyûmê tayîn dike û vê rewşê weke “dirûtî” binav kir. Aydenîz destnîşan kir ku bi tiştên tên kirin re îradeya gelê Kurd nas nakin û bi vê yekê re tê xwestin li Tirkiyeyê demokrasiyê bi temamî tasfiye bikin û ev bang li desthilatdariyê kir, “Eger hûn dixwazin îro bi gelê Kurd re aştiyê bikin, rêya vê li Îmralî ye. Keremkin herin Îmraliyê.”

Piştî daxuyaniyê banga tevlîbûna mitînga “Demokrasî û Azadiyê” hat kirin ku wê 17’ê Mijdarê de li Êlihê bê lidarxistin.