Rêxistina Rojnamevanên Sînornenas (RSF) da xuyakirin, ku li gelemperiya cîhanê 348 endamên medyayê ji ber pîşeyê xwe girtî ne. 

RSF'ê diyar kir, zext û zordariya piştî hewldana darbeyê ya li Tirkiyeyê hatiye kirin, bandor li daneyên giştî yên cîhanê kiriye û hejmara giştî jî zêde kiriye.

Li gorî rapora rêxistinê, zêdeyî 100 endamên medyayê li Tirkiyeyê girtî ne û 41 ji van jî yekser ji ber karê xwe hatine girtin.

Hat destnîşankirin, Tirkiye bi vê rewşa xwe bûye welatê herî zêde 'rojnamevanên profesyonel' lê girtî ne.

Di daxuyaniya RSF'ê de hat gotin, li gelmeperiya cîhanê 348 endamên medyayê girtî ne, ku piraniya van li Tirkiye, Çîn, Sûriye, Misir û Îranê girtî ne.

Tevî 187 rojnamevanên profesyonel 146 nivîskarên blogê û û 15 xebatkarên medyayên din, girtî ne.

Piştî Tirkiye herî zêde li Çînê xebatkarên medya girtî ne. Li Çînê 81 nivîskar bi giştî 103 endamên çapemeniyê girtî ne. Li Misirê jî 27 rojnamevan, li Sûriye 28, li Îranê 24 girtî ne. Li Misûlê jî 10 rojnamevan di destê DAIŞ'ê de girtî ne. 

Berdevka Desteya Rêveber a RSF'ê Brîtta Hîlpert bibîr xist, ku navê Tirkiyeyê di nava welatên dijminê azadiya çapemeniyê de ye.

CPJ: TIRKIYE YA HERÎ NEBAŞ E

Komîteya Parastina Rojnamevanan (CPJ) jî rapora xwe ya sala 2016'an eşkere kir û Tirkiye weke welatê herî nebaş ê di nava welatên rojnamevan lê girtî ne, bi nav kir.

Di rapora CPJ de bal hat kişandin ser rewşa Tirkiyeyê û hat gotin, "Li Tirkiyeyê zêdeyî 100 saziyên medyayê hatine girtin, zexteke giran li ser çapemeniyê heye û herî kêm 81 rojnamevan ji ber karê xwe girtî ne."