Ji pêkhateyên HDP’ê Serokê Giştî yê Partiya Şoreşger Ûfûk Gollu, Serokê Giştî yê SYKP’ê Ahmet Kaya, Alîkara Serokê Giştî yê ESP’ê Fadîme Çelebî û Hevseroka DBP’ê ya Stenbolê Hulya Aydogdû li rêxistina bajêr a HDP’ê têkildarî hilweşandina Sûrê ya bi destê dewletê civîna çapemeniyê lidar xistin.

‘PLANA HILWEŞANDINÊ TÊ KIRIN’

Hevserokê Giştî yê SKYP’ê Kaya di civînê de axivî û got “Tişta ku li Sûr û cihên din dikin, dixwazin vîna Tevgera Azadiyê ya Kurd û ya gelê Kurd bişkînin û ev plan jî ya sala 2014’an e.

Wekî ku hûn jî dizanin dîroka Sûrê digihêje B.M. 5 hezar salan. Li vê derê çand û ziman li hev zêde bûne. Divê mirov bi vî awayî li Sûrê binihêre.

Li Sûrê dewletê bi xwe diyar kiriye ku divê 595 avahî werin parastin. Di 2015-2016’an de êrîşî Sûrê kirin. Nêzî 45 hezar mirovan koç kirin. Ji 18 taxên Sûrê 6 heb jê hatine hilweşandin.

Beşeke mezin a taxa Alîpaşa hilweşandine, niha jî dora Lale Bey e. Pê re jî wê taxên din jî hilweşînin.”

ARMANCA DEWLETÊ

Kaya armanca dewletê ya hilweşandina Sûrê wisa rêz kir:

*Xerabkirina demografiya Sûrê

*Guherandina dîrok û çandê

*Tunekirina çanda hevgirtinê

*Dixwaze bike qada rantê

*Sûrê bike qereqol.

‘PLANA ŞARK ISLAHATÊ TÊ KIRIN’

Hevseroka HDP’ê ya Stenbolê Hulya Aydogdû jî diyar kir ku tiştên li Sûrê tên kirin dûmahîka Plana Şark Islahatê ye û got: “Ji Plana Şark Islahatê û heta niha koçkirin didome. Sûr, Cizîr, Nisêbîn hatiye hilweşandin. Sûr ji bo me sembol e. Li wê derê jiyaneke hevpar heye. Dixwazin bîra dîrokî ya hevpar û çanda hevgirtinê ji holê rakin. Dixwazin wê ji kokên wê dûr bixînin.”